Masat anticovid, ulje drastike të vdekjeve për shkak të gripit të zakonshëm
Nga OraNews Përditësimi i fundit 3 Mars 2021, 18:38
Duke qenë se koronavirusi vitin e kaluar erdhi në një trend në rritje, bëri që vëmendja ndaj gripit e viruseve të tjera të ulet ndjeshëm.
Sipas zyrtarëve të shëndetësisë, gripi po qarkullon në nivele të ulta, ku sipas raporteve vetëm një fëmijë në SHBA ka ndërruar jetë përgjatë këtij sezoni prej tij. Kjo është një rënie e konsiderueshme në shifra, duke pasur parasysh që në vitet e kaluar shënoheshin dhjetëra e qindra vdekje pediatrike.
Numri i vdekjeve për shkak të gripit në sezonin 2019-2020 sipas Qendrës për Kontrollin dhe Parandalimin e Sëmundjeve ka qenë 195 viktima në radhët e fëmijëve.
Ekspertët thonë se një kombinim i masave paraprake të koronavirusit dhe imunitetit ekzistues deri më tani pothuajse ka çrrënjosur nivelet e të prekurve nga gripi.
Gripi përhapet çdo vjeshtë dhe dimër, megjithëse me lloje të ndryshme dominuese dhe në nivele të ndryshme. Por pandemia e koronavirusit të këtij viti ka bërë që shumë njerëz të mbajnë distancën nga të tjerët, të shmangin udhëtimet dhe punën nga shtëpia, duke bllokuar transmetimin e gripit.
Trendi aktual nuk ka gjasa të mbajë. Gripi pritet të rikthehet vjeshtën dhe dimrin e ardhshëm nëse shumica e kufizimeve të koronavirusit janë hequr deri atëherë, paralajmërojnë ekspertët. Për shkak se fëmijët zakonisht përhapin gripin, shkollat e rihapura dhe qendrat e kujdesit ditor mund të kontribuojnë në mënyrë të konsiderueshme në rimëkëmbjen.
