Ambulanca del nga rruga në autostradën Durrës-Tiranë, vdes pacientja me Covid-19
Nga OraNews Përditësimi i fundit 14 Shkurt 2021, 08:20
Një grua e moshuar e prekur me koronavirus humbi jetën pasi autoambulanca që po e transportonte drejt spitalit në Tiranë u aksidentua në Durrës.
Ngjarja u shënua në orën 03:45, në autostradë, ku drejtuesi 51 vjeçar humbi kontrollin e mjetit që u përmbys në anë të rrugës pranë Maminasit.
Viktimë mbeti 71 vjeçarja Arziko Shehu, e cila sipas burimeve po dërgohej në spitalet Covid në kryeqytet,ndërsa e plagosur mbeti lehtë një familjare që po e shoqëronte!
Nga të dhënat e para shkak për aksidentin është bërë shpejtësia e lëvizjes së autoambulancës dhe prania e dëborës në rrugë.
Emergjenca shëndetësore ndërkohë mësohet se janë regjistruar edhe në bashki të tjera.
Në qarkun Elbasan, gjatë natës dy personave iu rrezikua jeta si pasojë e situatës së krijuar nga stuhia e dëborës dhe motit të keq.
Në fshatin Xibrakë një qytetar i ngecur në rrugë thirri ambulancën, e cila e transportoi në spital.
Ndërsa në fshatin Gjyrale, një të sëmuri me Covid iu rrezikua jeta pasi për shkak të mungesës së energjisë elektrike nuk mund të përdorte aparaturën e oksigjenit për trajtim në banesë.
Për të shmangur rrezikun që mund të krijohej në kushtet e motit të rënduar, familjes iu dërgua një gjenerator në banesë.
