Atentati në Vlorë me silenciator, flet Marion Mitro: Më qëlluan pas shpine
Nga OraNews Përditësimi i fundit 27 Janar 2021, 09:56
Marion Mitro, ish anëtari i bandës së tritolit në Vlorë, që mbeti i plagosur në një atentat, ka deklaruar në polici se nuk i pa njerëzit që tentuan ta ekzekutojnë pasi u qëllua pas shpine.
49 vjeçari ka zbuluar edhe rrengun që me gjasë i shpëtoi jetën.
“Isha duke ecur me kurriz dhe nuk i pashë personat që qëlluan. Pas sulmit, qëndrova i shtrirë derisa personat u larguan me makinë. Nuk kam pasur asnjë konflikt dhe se nuk di pse me sulmuan”, ka thënë ai.
Mitro u qëllua dy herë, ku një plumb e mori në krah dhe një e gërvishti në kokë, ndërsa dyshimet janë se u përdor pistoletë me silenciator.
Lëvizja e tij duke qëndruar shtrirë duket se u ka dhënë autorëve idenë se e kishin vrarë ndaj janë larguar me shpejtësi dhe e dogjën makinën në Selenicë.
Brenda mjetit të shkrumbuar që rezultoi i vjedhur, policia sipas burimeve nuk gjeti armë apo municione, ndërsa gjurmët i ka fshirë zjarri.
Skema e përdorur, përforcon dyshimin se atentati ishte i mirë organizuar dhe dyshohet i porositur.
Rreth 15 persona u shoqëruan dhe u morën në pyetje në polici në cilësinë e dëshmitarit apo personit në dijeni.
Grupi hetimor ndërkohë po verifikon pamjet e kamerave të sigurisë pranë vendit ku u sulmua 49 vjeçari Mitro, por sipas burimeve asnjë nuk ka fushëpamje të qartë, ç'ka mund të ndihmojë në ndërtimin e një identiteti të autorëve.
Marion Mitro ka qenë pjesë e grupit të Julian Sinanajt dhe është dënuar me 8 vite burg për tre vite dhe tre akuza.
Ai dyshohet se ka porositur atentatin e mbetur në tentativë ndaj ish-prefektit të Vlorës, Besnik Dervishi, që u zbulua para kryeministrisë.
