Aksidentoi për vdekje dy persona në Porcelan,11 vite burg Etjon Lazrit, dënimi ulet në 7.4 vite për gjykim të shkurtuar
Nga OraNews Përditësimi i fundit 19 Dhjetor 2020, 10:59
Etjon Lazri, djaloshi që në janar të 2020 aksidentoi për vdekje,Erion Ballën 36-vjeç dhe një grua 72-vjeçe të quajtur Hidajete Salliu, është dënuar me 11 vite burg.
Ai akuzohet për “Shkeljes së rregullave të qarkullimit rrugor” me pasojë vdekjen e dy personave.
Vendimi është marrë në 17 dhjetor nga Gjykata e Tiranës, e cila ka pranuar kërkesën e prokurorisë së Tiranës për shpalljen fajtor dhe dënimin me 11 vite burg të Lazrit.
“OraNews” mëson se për shkak të gjykimit të shkurtuar që kishte kërkuar i pandehuri Etjon Lazri, masë e dënimit është ulur përfundimisht në nivelin 7 vjet e 4 muaj burgim.
Vendimi është marë nga tresha e gjyqtarëve Besnik Hoxha, Sokol Tona dhe Altin Abdiu.
Që prej muajit Prill 2020, Lazri është liruar nga burgu dhe qëndron në masën e sigurisë “arrest shtëpie”, masë kjo që u vendos nga gjykata e Apelit Tiranë.
Shkak i këtij aksidenti me pasojë dy viktima të ndodhur në zonën e Porcelanit në muajin janar 2020, është shpejtësia tej normave të lejuara e mjetit që drejtonte Etjon Lazri dhe një parakalim i gabuar, i njërës prej makinave që ndodhej në rrugë.
Si pasojë humbën jetën Erion Balla 36 vjeç dhe një grua 72-vjece Hidajete Salliu.
