Siguria rrugore me koncesion, Sulçe: Shteti po i shet përgjegjësinë privatit
Nga OraNews Përditësimi i fundit 17 Dhjetor 2020, 17:13
Shqipëria mbetet vendi me fatalitetet më të larta nga aksidentet rrugore në Europën juglindore sipas vlerësimit të fundit të Komisionit Ekonomik të Kombeve të Bashkuara.
Studimi evidenton pikat e zeza në rrugët e vendit, problemin me vendet e parkimit që janë kthyer në pengesë për transporti publik, duke e rënduar më shumë qarkullimin rrugor.
Eksperti i sigurisë rrugore Artur Sulçe thotë se kjo situatë e rënduar vjen për shkak të mungesës së ndërhyrjeve në infrastrukturë.
“Mirëmbajtja e rrugëve,ato që kemi parë deri më sot, është vënë re që nuk mirëmbahet asgjë, vetëm pastrime të thjeshta.”
Kombet e bashkuara rekomandojnë ndalimin e pijes gjatë drejtimit të mjetit, përfshirë dhe konsumimin e duhanit, por ekspertët thonë se për këtë duhet një fushatë e fortë ndërgjegjësimi.
“Qoftë për alkoolin dhe duhanin mund të operojmë në të njëjtën mënyrë. Për drejtuesit e mjeteve të transportit public mund të zhvillohet kontrolli i tyre ose të ndalohet që gjatë drejtimit të pihet duhan.”
Qeveria Shqiptare parashikon që vitin e ardhshëm të japë me koncesion sigurinë rrugore me formulën Partneritet Publik Privat, me një detyrim prej 5 miliardë lekësh.
Për ekspertin Sulçe, dhënia e sigurisë rrugore me koncesion për menaxhimin e pikave të zeza tregon se Ministria e Brendshme dhe ajo e Infrastrukturës janë dorëzuar dhe duan t`ia delegojnë përgjegjësitë privatit.
"Ata duan të shmangin përgjegjësinë e vet, po ja shesin përgjegjësinë një enti tjetër, një subjekti privat. Nga shteti po kalon shitjha e përgjegjësisë te një subjekt privat që do bëjë mirëmbajtjen dhe sigurinë rrugore."
Në 11 muajt e vitit 2020 në Shqipëri janë regjistruar 1163 aksidente rrugore me 166 të vdekur.
