Rama akuzon opozitën si nxitëse të protestave: Thirrja ime për prindërit, ruajini fëmijët nga kthetrat e të paudhëve
Nga OraNews Përditësimi i fundit 11 Dhjetor 2020, 16:10
Ndërsa pritet protesta e radhës gjatë pasdites së sotme për vrasjen e të riut Klodian Rasha nga policia me kërkesë kryesore dorëheqjen e kreut të Policisë së Shtetit, Ardi Veliu, kryeministri Rama ka reaguar sërish duke akuzuar presidentin dhe opozitën si nxitës të dhunës.
Rama: Opozita dhe Presidenti janë jo vetëm nxitësit,po edhe orkestruesit e dhunës që poshtëron kujtimin e Klodianit, gjoja për drejtësi por në fakt vetëm për hesapet politike të LulitSaliutIIliritMonikës! Janë të dëshpëruar se s'kanë asnjë shans të rikthehen në pushtet me zgjedhje!S'kanë më njësi komunale për të mbushur autobuzë, e dinë që përveç turmës së tkurrur të militantëve s'i ndjek më askush dhe paguajnë lart e poshtë deri edhe minorenë, duke u kërkuar të thyejnë e djegin rrugëve të qytetit, që të thonë ja s'ka rend, s'ka siguri, s'ka shtet.Dhe ndërkohë që polici fajtor del para gjykatës,ministri i brendshëm jep dorëheqjen(edhe pse aspak fajtor, po qytetar fisnik që njeh ndjesën),Saliu krenohet si ka vrarë e si do vriste akoma, Iliri akuzon policinë, Monika shpërndan gurët, Luli ha përshesh e pret të bëhet dhëndërr!
Duke aluduar se pas protestave është opozita, Rama ka një apel.
Rama: Thirrja ime për prindërit e minorenëve të abuzuar nga LSI është ruajini fëmijët nga kthetrat e të paudhëve pa atdhe, ndërsa për këdo tjetër që merr rrugët për të thyer e për të djegur, duhet të jetë shumë e qartë që loja e forcës me ligjin e me shtetin mbaron prapa hekurave!
