Kreu i SHÇBA të hetojë urgjentisht dhunën e ushtruar në Komisariat" thirrja e RTV Ora e Ora News dhe e shoqatave të gazetarëve
Nga OraNews Përditësimi i fundit 11 Dhjetor 2020, 10:35
Gazetarë dhe institucione mediatike janë solidarizuar dhe e quajnë të papranueshme dhunën dhe shoqërimin e gazetarit Xhoi Malësia në polici mbrëmjen e djeshme ndërsa po transmetonte live momentin kur policia shoqëronte disa persona.
Ata i kërkojnë kreut të SHÇBA, Rrumbullaku të hetojë ngjarjen.
Në solidaritet ishin disa shoqata si AEJ, Unioni i Gazetarëve Shqiptarë, Shoqata e Gazetarëve Profesionistë të Shqipërisë dhe Lidhja e Gazetarëve të Shqipërisë
Edhe Stafi i RTV Ora dhe Ora News dënon çdo lloj forme të dhunës të ushtruar ndaj çdo protestuesi që ka respektuar të drejtat ligjore.
Stafi i RTV Ora dhe Ora News dënon aktin e efektivëve të Policisë për ndalimin e gazetarit Xhoi Malësia, i cili ishte në transmetim të drejtpërdrejtë në momentin e shoqërimit nga efektivë të Policisë
Dënohet gjithashtu edhe dhuna e ushtruar në ambientet e Komisariatit ndaj kolegut Malësia apo të shoqëruarve të tjerë.
Stafi i RTV Ora dhe Ora News i bën thirrje urgjente kreut të SHÇBA për të hetuar urgjentisht dhunën e ushtruar në Komisariat.
“ Kreu i SHÇBA, Rrumbullaku ka për detyrë të sqarojë situatën për dhunën e ushtruar ndaj medias dhe rezultati i hetimit për dhunën të jetë deciziv që forma të tilla të mos përsëriten" thuhet në deklaratë.
