Rama në SHBA për vaksinën, Basha kërkon ndihmë nga vendet e BE: Çfarëdo sasie është e mirëpritur

Nga OraNews Përditësimi i fundit 7 Dhjetor 2020, 19:08

Ndërsa kryeministri Edi Rama udhëtoi SHBA për të siguruar vaksinë kundër Covid, kreu i opozitës Lulzim Basha ka kërkuar ndihmën e vendeve anëtare të BE, që janë pjesë e PPE, për të asistuar Shqipërinë me furnizimin me vaksina kundër COVID-19.

Kërkesën Basha e bëri  në mbledhjen e sotme të Asamblesë Politike të Partive Popullore Europiane, e cila zhvilloi punimet online.

Basha: Shqipëria ndodhet në krizë të thellë ekonomike, papunësia është rritur dhe shumica dërrmuese e qytetarëve nuk e perballojnë dot blerjen e medikamenteve anti-COVID, të cilat fatkeqësisht në Shqipëri, janë me çmime më të larta se në çdo vend tjetër.Ndihma e vendeve tuaja me vaksina anti-COVID, në çfarëdo sasie që të jetë, është mëse e mirëpritur, dhe ne do t'ju jemi gjithmonë mirënjohës. Vendi im dhe qytetarët e mi, jane në një situatë tejet të vështirë, e cila sa vjen dhe po përkeqësohet. Prandaj, ju lutem na ndihmoni në këto kohë tejet të vështira.

Shqipëria është vendi me numrin më të ulët të testimeve, çka e bën të pamundur në një anë identifikimin në kohë të të infektuarve me COVID-19 dhe trajtimin e tyre në mënyrë profesionale, dhe në anën tjetër shkëputjen e zinxhirit të infektimit. Sot, numri i të infektuarve është rritur dhe shtrirë kudo, fatalitetet po ashtu, ndërsa kapacitetet spitalore janë ezauruar. Shqipëria vuan dhe mungesën e stafeve mjekësore, pasi ka numrin më të ulët të mjekëve dhe infermierëve për banor.

Për çështjen e vaksinës, Basha pati biseda të veçanta edhe me përfaqësues të qeverive të vendeve anëtare të BE, biseda që do të vazhdojnë edhe në ditët në vijim.

Në Asamblenë Politike të PPE, një vend të veçantë zuri dhe klima e rënduar politike, e diktuar nga ndryshimet e njëanshme të Kodit Zgjedhor nga ana e mazhorancës, e cila prishi dhe marrëveshjen e arritur me mbështetjen e partnerëve europianë dhe amerikan.

Për këtë PPE doli me një rezolutë ku i bën thirrje qeverisë shqiptare të bëjnë çdo përpjekje për të tejkaluar krizën e thellë kushtetuese dhe politike në Shqipëri.