Parkimi në Tiranë, mision i pamundur
Nga OraNews Përditësimi i fundit 2 Tetor 2020, 14:56
Të parkosh në rrugët e Tiranës është bërë sfidë për çdo drejtues automjetesh.
"Shumë e vështirë, nuk ka asnjë vend parkimi. Po të duash të mbarosh punë, nuk ke vend ku të parkosh makinën", shprehet drejtuesi i automjetit.
Ato detyrohen të parkojnë me pagesë, për të cilën thonë se nuk e kanë gjithmonë mundësinë.
"Kur shkojmë nga 'Mine Peza' rrijmë gjysmë ore në mëngjes, shkojmë nga 'Rruga e Kavajës' po ashtu. Jemi bërë ta lëmë makinën në mes të rrugës", shprehet drejtuesi i automjetit.
Trafiku i rënduar dhe mungesa e zgjidhjeve i bën që të thyejnë rregullat, ndaj dhe gjobat i kanë të shpeshta.
"Përditë, i kam sikur jam duke ngrënë bukë çdo ditë", shprehet drejtuesi i automjetit.
Vetë institucionet e bashkisë zgjedhin të shkelin rregullat, siç është rasti i mjetit të punonjësve të UKT që ka ndaluar në korsinë e biçikletave.
"Nuk është halli se po paguajmë, por se nuk ka vende parkimi", shprehet drejtuesi i automjetit
Parkimet vend e pa vend, bëhen pengesë për qarkullimin normal të trafikut. Me trafikun, nga një anë, mungesën e vendparkimeve në anën tjetër, duket se të banosh në Tiranë për qytetarët po bëhet e vështirë.
