Trump gati për vendimin final, por Irani nuk 'lëshon pe'
Nga OraNews Përditësimi i fundit 30 Maj 2026, 16:56
Bisedimet mes Shteteve të Bashkuara dhe Iranit për një marrëveshje të mundshme kanë hyrë në një fazë më intensive, por ende nuk ka një dakordësi përfundimtare mes palëve.
Presidenti amerikan Donald Trump po zhvillon konsultime me ekipin e sigurisë për të vendosur për hapat e ardhshëm, ndërsa sinjalet nga Uashingtoni tregojnë se negociatat janë në një moment vendimtar. Nga ana tjetër, Irani ka bërë të ditur se diskutimet vazhdojnë dhe se nuk ka ende një marrëveshje të finalizuar.
Sipas mediave ndërkombëtare, në tryezë është një draft që parashikon një periudhë të përkohshme armëpushimi dhe lehtësime në disa lëvizje detare, përfshirë hapje më të madhe në Ngushticën e Hormuzit. Kjo fazë shihet si një hap tranzitor për të fituar kohë në negociata më të gjera.
Një nga pikat më të vështira mbetet programi bërthamor i Iranit.
SHBA kërkon kufizimin e pasurimit të uraniumit, i cili aktualisht raportohet se arrin nivele të larta, ndërsa Teherani nuk pranon të heqë dorë nga ai që e konsideron të drejtë të tij.
Po ashtu në diskutim janë edhe sanksionet ekonomike dhe fondet iraniane të ngrira jashtë vendit. Irani kërkon akses në to, ndërsa pala amerikane po shqyrton mënyra të tërthorta për zhbllokimin e tyre.
Pavarësisht lëvizjeve të fundit, palët mbeten ende larg një marrëveshjeje përfundimtare, dhe çdo hap i mëtejshëm pritet të kërkojë kompromise të rëndësishme.
