“Disfata ushtarake ndaj Iranit”/ Trump lë të hapur mundësinë e veprimeve të reja nga SHBA
Nga OraNews Përditësimi i fundit 15 Maj 2026, 08:29
Presidenti amerikan Donald Trump ka reaguar sërish me tone të ashpra ndaj Iranit, duke folur për një disfatë ushtarake të Teheranit dhe duke lënë të hapur mundësinë e veprimeve të mëtejshme nga SHBA.
Në një postim në rrjetin e tij Truth Social, ai ka thënë se Shtetet e Bashkuara janë rikthyer në një periudhë force dhe ndikimi në arenën ndërkombëtare.
Ai iu është përgjigjur edhe deklaratave të mëparshme që i atribuohen presidentit kinez Xi Jinping, i cili ka folur për një Amerikë në rënie.
Trump ka pranuar se një pjesë e atyre komenteve mund të kenë qenë të sakta, por sipas tij kjo i përket periudhës së administratës së Joe Biden dhe jo situatës aktuale.
Në të njëjtin postim, ai ka përfshirë edhe Iranin, duke e cilësuar situatën si një disfatë ushtarake dhe duke lënë të kuptohet se zhvillimet mund të vazhdojnë edhe më tej.
Këto deklarata vijnë në një moment kur bisedimet mes SHBA-së dhe Iranit për programin bërthamor dhe sanksionet mbeten të bllokuara, ndërsa tensionet në rajon vazhdojnë.
Trump ka folur gjithashtu për ekonominë amerikane, duke e përshkruar SHBA-në si një nga vendet më të forta aktualisht në botë, me investime të larta dhe performancë të mirë në tregjet financiare.
Në postimin e tij, ai ka kritikuar edhe ish-administratën Biden, duke përmendur çështje si kufijtë, krimi dhe politikat ekonomike, ndërsa ka përsëritur se Shtetet e Bashkuara sot ndodhen në një situatë shumë më të fortë se dy vite më parë.
