Fundoset anija pranë Androsit/ Greqia arreston kapitenin dhe oficerin pas përplasjes me shkëmbin gjatë rrugës drejt Ukrainës
Nga OraNews Përditësimi i fundit 6 Maj 2026, 18:32
Një anije mallrash është fundosur në ujërat pranë ishullit Andros në Greqi, ndërsa dy drejtues të ekuipazhit janë arrestuar pas ngjarjes.
Anija “Corsage C”, me flamur të Vanuatu-s, ishte nisur nga Kroaci dhe kishte bërë një ndalesë edhe në Shqipëri, përpara se të vazhdonte drejt Ukrainë.
Gjatë lundrimit në veri të Androsit, ajo u përplas me një shkëmb dhe më pas u fundos.
Në bord ndodheshin 9 anëtarë të ekuipazhit, të cilët arritën të shpëtonin. Disa prej tyre u nxorën nga deti, ndërsa të tjerë u gjetën në breg shkëmbor dhe u transportuan në port në gjendje të mirë shëndetësore.
Pas incidentit, autoritetet greke arrestuan kapitenin 52-vjeçar dhe oficerin 32-vjeçar të anijes.
Ata akuzohen për shkelje që lidhen me neglizhencën dhe shkaktimin e rrezikut që çoi në fundosjen e mjetit lundrues.
Në zonë u angazhuan disa mjete të Rojës Bregdetare dhe një helikopter për operacionin e shpëtimit. Paralelisht, u morën masa për të parandaluar ndotjen e detit, pasi ekziston rreziku i rrjedhjes së karburantit nga anija e fundosur.
Hetimet për shkaqet e plota të ngjarjes po vijojnë nga autoritetet portuale në Andros.
