“ZHBLLOKOHET” EVERESTI/ Rruga drejt majës më të lartë në botë ishte zënë nga një masë e madhe akulli
Nga Katerina Hysenllari Përditësimi i fundit 29 Prill 2026, 14:35
Një masë e madhe akulli bllokoi për dy javë rrugën drejt majës më të lartë në botë. Ekspertët kanë hapur tanimë një itinerar të ri për në Everest, megjithatë autoritetet apelojnë për kujdes të shtuar për shkak të blloqeve të paqëndrueshme të akullit.
Rruga drejt majës së Malit Everest është rihapur pas dy javësh bllokimi, pasi një masiv i madh akulli kishte penguar lëvizjen e alpinistëve.
Autoritetet në Nepal konfirmuan se ekipet e specializuara, të njohura si “icefall doctors”, kanë arritur të sigurojnë një itinerar të ri dhe të vendosin litarë sigurie atje.
Sipas drejtorit të përgjithshëm të turizmit në Nepal, rruga tani është funksionale, megjithëse ende mund të konsiderohen disa rreziqe potenciale.
Kampi 2 ndodhet në një lartësi prej rreth 6,400–6,500 metrash dhe është një pikë kyçe për alpinistët që synojnë majën më të lartë në botë.
Përgatitjet për sezonin pranveror, që konsiderohet periudha më e favorshme për ngjitje, janë vonuar ndjeshëm.
Kjo ka rritur shqetësimet se alpinistët mund të përballen me radhë të gjata drejt majës, një problem i përsëritur vitet e fundit.
Rreth 425 alpinistë kanë marrë leje për të tentuar ngjitjen këtë vit, duke gjeneruar mbi 6 milionë dollarë të ardhura për qeverinë nepaleze.
Ndërkohë, autoritetet kanë paralajmëruar për kujdes maksimal, pasi një tjetër masë akulli mbetet e paqëndrueshme dhe mund të shembet brenda pak ditësh.
Alpinistëve u është kërkuar të shmangin transportin e ngarkesave të rënda në zonat më të rrezikshme.
