Eksperti i ekonomisë, Beqiri: Ja ku i shpenzojnë shqiptarët paratë e tyre
Nga Katerina Hysenllari Përditësimi i fundit 28 Prill 2026, 17:44
Menaxhimi i financave personale mbetet një sfidë për shumicën e familjeve shqiptare, të cilat shpenzojnë pjesën më të madhe të të ardhurave mujore për nevoja bazë, duke lënë pak hapësirë për kursime apo investime afatgjata.
Në një intervistë në “Ora News” mbi këtë temë, eksperti i ekonomisë, Gent Beqiri, analizoi zakonet financiare të shqiptarëve dhe faktorët që i formësojnë ato.
Sipas ekspertit Beqiri, familjet shqiptare, veçanërisht ato që i përkasin shtresave të ulëta dhe të mesme, nuk kanë një traditë të fortë të kursimit.
Një pjesë e konsiderueshme e të ardhurave, që arrin deri në 60-65%, shkon për të mbuluar shpenzimet fikse. Këtu përfshihen nevojat themelore si ushqimi, qiraja, faturat e energjisë, si dhe kostot për arsimin dhe shëndetësinë. Kjo situatë tregon se planifikimi financiar nuk është një praktikë e përhapur.
Pavarësisht vështirësive, familjet shqiptare tregojnë një prirje të qartë për të mos kursyer kur bëhet fjalë për arsimin e fëmijëve apo kujdesin shëndetësor.
Këto dy fusha konsiderohen prioritete absolute, duke bërë që çdo mundësi kursimi të drejtohet gjetkë.
Kjo mungesë e një planifikimi të mirëfilltë financiar për investime apo qëllime të tjera afatgjata, sipas ekspertit, ndikohet edhe nga mungesa e një kulture historike në këtë drejtim.
Një nga pengesat kryesore për një planifikim më të mirë financiar është niveli i lartë i ekonomisë informale në vend.
Një sasi e madhe parash qarkullon jashtë sistemit bankar, gjë që e vështirëson qasjen në instrumente formale financiare.
Megjithatë, vihet re një ndryshim gradual tek brezat e rinj. Të ndikuar nga teknologjia, ata po tregojnë më shumë interes ndaj formave të reja të menaxhimit financiar dhe investimeve, siç janë kriptovalutat, edhe pse kjo mbetet ende një dukuri e kufizuar.
