RUSIA KËRCËNON NATON! Ekspertët e diplomacisë rendisin, 5 pikat kyçe ku aleanca është kapur e papërgatitur
Nga OraNews Përditësimi i fundit 28 Prill 2026, 17:09
NATO përballet me dobësi serioze në mbrojtje, ndërsa paralajmërimet për një sulm të mundshëm rus ndaj një vendi të aleancës, po shtohen. Mungesa e municioneve, problemet në ajër dhe det, si dhe përçarjet politike, e vendosin aleancën përballë një prove të vështirë për sigurinë e saj.
Aleanca më e madhe ushtarake në botë, NATO, përballet me sfida serioze sigurie, ndërsa paralajmërimet për një sulm të mundshëm nga Rusia ndaj vendeve anëtare po shtohen.
Zyrtarë evropianë të mbrojtjes vlerësojnë se Moska mund të jetë në gjendje të ndërmarrë një ofensivë ndaj një vendi të aleancës deri në vitin 2029, duke e bërë urgjente rritjen e gatishmërisë ushtarake.
Një nga problemet kryesore është mungesa e municioneve. Konfliktet e fundit, përfshirë përplasjet në Lindjen e Mesme, kanë treguar se rezervat e raketave të mbrojtjes ajrore si Patriot po shterojnë me shpejtësi.
Ekspertët paralajmërojnë se në një konflikt të zgjatur, vendet e NATO-s mund të mbeten pa kapacitete mbrojtëse brenda pak javësh.
Në ajër, dominimi nuk është më i garantuar. Sulmet masive me dronë dhe raketa kanë treguar kufizimet e fuqisë ajrore tradicionale, duke detyruar aleancën të rishikojë strategjitë e saj dhe të investojë në teknologji më të avancuara.
Edhe në det, situata mbetet problematike. Marina e disa vendeve anëtare rezulton e papërgatitur, me mungesë investimesh dhe kapacitetesh operative, duke ngritur pikëpyetje për aftësinë e reagimit në rast krize.
Por sfidat nuk janë vetëm ushtarake. Përçarjet politike brenda aleancës janë thelluar, sidomos në raportet me SHBA-në dhe kërkesat për më shumë angazhim nga Evropa.
Këto tensione rrezikojnë të dobësojnë kohezionin në një moment kritik. Në këtë panoramë, Ukraina mbetet një faktor kyç. Përvoja e saj në luftën me dronë dhe mbrojtjen kundërajrore po konsiderohet thelbësore për të ardhmen e strategjisë së NATO-s.
Ndërsa kërcënimi nga Rusia perceptohet gjithnjë e më real, aleanca përballet me një provë të madhe: të mbyllë boshllëqet në mbrojtje dhe të ruajë unitetin përballë një skenari të mundshëm lufte.
