LIGJ PËR KAFSHËT PAS NDARJES SË ÇIFTEVE/ Brazili njeh kujdestarinë e përbashkët pas divorcit

Nga Katerina Hysenllari Përditësimi i fundit 2 Prill 2026, 13:23

Brazili ka miratuar një ligj për kujdestari të përbashkët të kafshëve pas ndarjes së çifteve. Vendimi pasqyron rëndësinë në rritje të tyre në një vend me rreth 213 milionë banorë ku janë të regjistruara 160 milionë kafshë shtëpiake.

Brazili ka miratuar një ligj të ri që ndryshon mënyrën se si trajtohen kafshët shtëpiake në rast ndarjeje apo divorci, duke u dhënë çifteve mundësinë për kujdestari të përbashkët mbi to.

Ky vendim është marrë nga Kongresi i Brazilit dhe konsiderohet një reflektim i rëndësisë në rritje që njerëzit u japin kafshëve të tyre.

Sipas ligjit të ri, në rast se një çift ndahet dhe nuk arrin një marrëveshje për kujdesin ndaj kafshës, do të jetë gjykata ajo që do të vendosë për ndarjen e kujdestarisë dhe për shpërndarjen e drejtë të shpenzimeve për mirëmbajtjen e saj.

Një nga kushtet kryesore është që kafsha të ketë jetuar pjesën më të madhe të jetës me çiftin në fjalë.

Megjithatë, ligji parashikon disa kufizime të rëndësishme.

Kujdestaria e përbashkët nuk do të lejohet në rastet kur njëri nga partnerët ka precedent penal ose kur ekziston histori apo rrezik i dhunës.

Kjo synon të mbrojë jo vetëm individët, por edhe mirëqenien e kafshëve.

Sipas të dhënave nga Instituto Pet Brasil, në Brazil jetojnë rreth 160 milionë kafshë shtëpiake, një shifër shumë e lartë për një vend me rreth 213 milionë banorë. Kjo tregon lidhjen e fortë emocionale që shumë familje kanë me kafshët e tyre, të cilat shpesh konsiderohen si anëtarë të familjes.

Ligjvënësit kanë theksuar se ky ndryshim vjen si përgjigje ndaj një rritjeje të ndjeshme të konflikteve gjyqësore për kujdestarinë e kafshëve pas ndarjeve.

Gjithashtu, ata nënvizojnë se në shoqërinë moderne, ku shumë çifte kanë më pak fëmijë, lidhja me kafshët bëhet edhe më e fortë.

Ndërkohë, vende të tjera kanë qasje të ndryshme. Në Mbretërinë e Bashkuar, për shembull, kafshët trajtohen ende si pasuri materiale, ndërsa në Francë ato konsiderohen si “qenie të gjalla dhe me ndjenja”, duke lejuar kështu vendime më fleksibël për kujdestarinë.