VIDEO/ Njihuni me historitë e grave fermere në këtë 8 Mars: Kontribut i çmuar në bujqësi dhe ekonominë familjare
Nga OraNews Përditësimi i fundit 8 Mars 2026, 19:37
Kryeministri Edi Rama ka ndarë sot në rrjetet sociale historinë e disa grave fermere, të cilat çdo ditë punojnë në bujqësi dhe blegtori, duke kontribuar në ekonominë familjare dhe zhvillimin e sektorit bujqësor në vend.
Në mesazhin e publikuar me rastin e 8 Marsit, Kryeministri vlerësoi rolin dhe përkushtimin e grave që punojnë në fshat, duke theksuar se puna e tyre është një mbështetje e rëndësishme për familjen dhe për ekonominë e vendit.
Një nga gratë fermere tregoi se punon në fermën blegtorale të familjes së bashku me fëmijët e saj, ku kujdesen për gjedhët dhe sigurojnë prodhim të bollshëm qumështi. Ajo theksoi se puna në fermë kërkon përkushtim të përditshëm, por është edhe burimi kryesor i të ardhurave për familjen.
Ndërkohë, një tjetër fermere rrëfeu për angazhimin e saj në punët e arës, duke treguar se merret me të gjitha proceset e punës në bujqësi dhe është e përkushtuar prej vitesh ndaj këtij aktiviteti. Sipas saj, puna në tokë kërkon durim dhe përpjekje të vazhdueshme, por jep kënaqësi kur sheh rezultatet e prodhimit.
Kryeministri Rama theksoi se në sektorin e bujqësisë janë të angazhuara shumë gra, të cilat me punën dhe përkushtimin e tyre kontribuojnë çdo ditë në zhvillimin e ekonomisë familjare dhe në rritjen e prodhimit bujqësor.
Mesazhi i publikuar në këtë ditë simbolike synon të vlerësojë rolin e grave në bujqësi dhe në jetën ekonomike e sociale të vendit, duke evidentuar kontributin e tyre të rëndësishëm në komunitetet rurale dhe në zhvillimin e qëndrueshëm të sektorit.
