VIDEO/ SHBA publikon pamjet! Të paktën 140 vetë rezultojnë të zhdukur pas fundosjes së anijes iraniane pranë Sri Lankës

Nga OraNews Përditësimi i fundit 4 Mars 2026, 18:06

Flota detare e Sri Lankës ka konfirmuar se ka shpëtuar 32 persona pas marrjes së një sinjali emergjence nga anija e marinës iraniane “IRIS Dena” herët në mëngjes.

Zëdhënësi i flotës së Sri Lankës, Budhika Sampath, tha se operacioni i shpëtimit u krye edhe pse incidenti ndodhi jashtë ujërave territoriale, por brenda zonës së tyre të kërkim-shpëtimit, duke i detyruar të reagojnë sipas detyrimeve ndërkombëtare.

Ai deklaroi se ekipet gjetën persona duke notuar në det dhe më pas i shpëtuan, ndërsa pranë zonës u vërejtën njolla nafte dhe gomone shpëtimi që lundronin në ujë.

Sipas dokumentacionit të anijes, në bord besohet se ndodheshin rreth 180 persona, por numri i saktë i të zhdukurve mbetet i paqartë.

Autoritetet ushtarake të Sri Lankës thonë se deri tani nuk mund të konfirmojnë shkakun e fundosjes dhe kanë hedhur poshtë raportimet se incidenti mund të jetë shkaktuar nga një sulm me nëndetëse.

Më herët, sekretari i Ministrisë së Mbrojtjes së vendit, Marshal Sampath Thuiyakontha, deklaroi se rreth 140 persona mendohet të jenë të zhdukur. Operacionet e kërkim-shpëtimit vazhdojnë, ndërsa autoritetet po hetojnë rrethanat dhe shkakun e ngjarjes së rëndë.