HISTORI ITALIANE/ Një qytet në lot për Rossinin: Rovigo i dedikon statujë maçokut simbol
Nga OraNews Përditësimi i fundit 17 Shkurt 2026, 13:10
Një ndjenjë zemërimi dhe trishtimi ka përfshirë Rovigo – një provincë në rajonin e Venetos, në Itali – pas ndarjes nga jeta të Rossini-t, maçokut maskotë që për 13 vite u kthye në simbolin më të dashur të komunitetit, sipas “La Stampa”.
I ardhur nga Bosnjë-Hercegovina më shumë se një dekadë më parë, Rossini fitoi shpejt zemrat e banorëve, duke u shndërruar në “rezidentin me gëzof” më të famshëm të qytetit dhe një yll të vërtetë të rrjeteve sociale.
Me shëtitjet e tij të përditshme nëpër rrugicat historike dhe qetësinë karakteristike, ai u bë pjesë e pandashme e jetës urbane.
Por të shtunën, në Ditën e Shën Valentinit, historia e tij u ndërpre tragjikisht. Rossini humbi jetën pasi u përplas nga një automjet në qendër të qytetit – një lajm që tronditi thellë komunitetin.
Brenda pak orësh, vendi i aksidentit u kthye në një altar të hapur nën qiell: i mbuluar me lule shumëngjyrëshe, mesazhe prekëse, lodra prej pelushi dhe tullumbace.
Një skenë sa e dhimbshme, aq edhe dëshmi e dashurisë së jashtëzakonshme që qyteti kishte për të.
Qindra qytetarë kanë ndarë në rrjetet sociale fotografi, kujtime dhe histori të vogla nga takimet me Rossini-n.
Pamja e një qyteti të tërë që vajton për një maçok është cilësuar si një moment i rrallë solidariteti emocional – prekës dhe i paharrueshëm.
Në nder të tij, autoritetet lokale kanë bërë të ditur se Rovigo do t’i dedikojë një statujë Rossini-t, si shenjë mirënjohjeje për gëzimin dhe ngrohtësinë që solli ndër vite.
Një homazh i përhershëm për maçokun që tejkaloi kufijtë e një kafshe shtëpiake dhe u kthye në simbol të dashurisë, përkatësisë dhe bashkimit të një komuniteti të tërë.
