FOTO/ 70-vjetori i Kryepiskopit Joan dhe fillimi i Vitit të Ri festohen në Katedralen "Ngjallja e Krishtit"
Nga OraNews Përditësimi i fundit 1 Janar 2026, 18:07
Sot, 1 janar 2026, besimtarë të shumtë nisën Vitin e Ri me adhurim dhe urime për 70-vjetorin e Kryepiskopit Joan. Liturgjia Hyjnore u drejtua nga Fortlumturia e Tij në Katedralen “Ngjallja e Krishtit” në Tiranë, së bashku me Mitropolitin e Beratit, Hirësi Asti, dhe klerikë të tjerë nga Kryepiskopata dhe e gjithë Shqipëria.
Në një atmosferë të mbushur me besimtarë, u kremtua Rrethprerja e Zotit dhe festa e Shën Vasilit të Madh, ndërsa pas Liturgjisë, Arkimandrit Ignati dhe Hirësi Asti i përcollën urime të përzemërta Kryepiskopit për përvjetorin e veçantë të 70-të.
Në vijim, Kryepiskopi Joan drejtoi shërbesën e Dhoksologjisë për Fillimin e Vitit të Ri, duke i lutur Zotit që të bekojë këtë vit të ri dhe të sjellë paqe e shëndet për besimtarët.
Përvjetori i 70-të i Kryepiskopit shënon një jetë të tërë në shërbim të Kishës Orthodhokse, nga studimet në Amerikë te veprimtaria 27-vjeçare në Mitropolinë e Korçës, deri te froni i Kryepiskopit të Shqipërisë. Besimtarë, klerikë dhe personalitete të larta të vendit morën pjesë në pritjen festive te Qendra Sinodike, ku Kryepiskopi bekoi dhe shpërndau kekun e Shën Vasilit të Madh.
Ai mori urime edhe nga Patriarkë të Kishave simotra, Presidenti i Republikës së Shqipërisë, Kryeministri, deputetë, ministra dhe figura të shquara të jetës publike.
Ky përvjetor nuk shënon vetëm moshën, por edhe një jetë të tërë të përkushtuar ndaj Zotit dhe shërbimit për Kishën dhe komunitetin.
