Skandali miliarda dollarësh që tronditi Malajzinë! Ish-kryeministri Najib Razak dënohet me 15 vjet burg
Nga OraNews Përditësimi i fundit 26 Dhjetor 2025, 16:56
Një gjykatë malajziane dënoi ish-kryeministrin malajzian Najib Razak me 15 vjet burg, për shpërdorim pushteti dhe pastrim parash, në lidhje me skandalin e korrupsionit prej miliarda dollarësh në fondin shtetëror të investimeve “1Malaysia Development Berhad” (1MDB).
Vendimi u mor para një gjyqtari të rangut të lartë në Malajzi, i cili e shpalli Najibin fajtor për të gjitha akuzat, përfshirë katër akuza për abuzim me pushtetin dhe 21 akuza për pastrim parash, të gjitha të lidhura me transferimin e miliarda dollarëve që ishin marrë nga fondi 1MDB.
Sipas agjencisë ndërkombëtare Reuters, dënimet me nga 15 vjet për secilën nga dy akuzat, janë bashkuar në një të vetëm dhe dënimi total mbetet 15 vjet burg.
Vendimi është zhvillimi më i rëndësishëm gjyqësor deri më sot në çështjen e gjatë 1MDB, e cila filloi të zhvillohej vite më parë dhe është përshkruar si një nga rastet më të mëdha të korrupsionit shtetëror në botë.
Akuzat kundër Razak lidhen me abuzim sistematik të pushtetit kur ai ishte kryeministër dhe kreu i fondit, ndërsa provat në dosje tregojnë se më shumë se 1 miliard dollarë përfunduan në llogari personale të lidhura me të.
Ish-kryeministri 72-vjeçar, djali i njërit prej themeluesve të Malajzisë, ka qenë në burg që nga viti 2022, kur gjykata më e lartë e vendit mbështeti një dënim të mëparshëm me 12 vjet burg për korrupsion në një rast tjetër të lidhur gjithashtu me 1MDB. Ky dënim u ul më vonë me një vendim të bordit të faljes.
Megjithatë, në këtë gjyq të ri, gjykata nuk u kufizua vetëm në akuzën fillestare, por konsideroi se provat ishin të pakundërshtueshme, duke hedhur poshtë pretendimet e mbrojtjes se ndjekjet penale ishin produkt i persekutimit politik.
Dënimi shoqërohet gjithashtu me gjoba të konsiderueshme monetare dhe urdhra për rikuperimin e aseteve që dyshohet se lidhen me korrupsionin, në një përpjekje për të kufizuar pasojat financiare të përvetësimit.
Rasti 1MDB ka shkaktuar trazira ndërkombëtare, pasi përfshin flukse të mëdha financiare në të gjithë botën, ndërsa ka ndikuar edhe në skenën politike në Malajzi, me implikime të rëndësishme për imazhin e institucioneve politike dhe luftën kundër korrupsionit në vend.
