Grenell për takimin e Ramës me Thaçin: Kryeministri shqiptar ka të drejtë, Smith ka turpëruar europianët

Nga OraNews Përditësimi i fundit 18 Dhjetor 2025, 21:32

I dërguari presidencial për misione speciale të SHBA, Richard Grenell, ka komentuar vizitën e kryeministrit Edi Rama ditën e sotme në Hagë ku u takua me ish-presidentin e Kosovës, Hashim Thaçi.

Grenell shprehet se Rama e kritikon ashpër çështjen ligjore të Jack Smith dhe se ka turpëruar europianët për lejimin e vazhdimit të kësaj padrejtësie, duke shtuar se kryeministri shqiptar ka të drejtë dhe Smith është një turp.

“Aleati i NATO-s dhe kryeministri i Shqipërisë, Edi Rama, e hedh poshtë çështjen ligjore të Jack Smith kundër ish-presidentit Thaçi në Hagë dhe turpëron europianët për lejimin e vazhdimit të kësaj padrejtësie. Jack Smith është një turp. Rama ka të drejtë”, shkruan Grenell në platformën X.

Kryeministri Edi Rama vizitoi sot në Hagë, ish-presidentin e Kosovës, Hashim Thaçi, i cili mbahet në paraburgim që prej nëntorit të vitit 2020.

Në një reagim në rrjetet sociale, Rama bëri të ditur se e ka gjetur Thaçin të qetë, edhe pse me ndalime absurde të drejtash minimale.

Kryeministri e cilësoi mbajtjen e Thaçit dhe ish-liderëve të UÇK-së në paraburgim si “padrejtësi ulëritëse në zemër të Europës demokratike, me bekimin e me fondet e taksapaguesve të vendeve demokratike”.