THYHET SERBIA/ Uvil Zajmi nuk i fsheh emocionet: Nuk e kisha parë ndonjëherë Kombëtaren në të tillë nivel

Nga Lili Saraçi Përditësimi i fundit 12 Tetor 2025, 12:58

Festë deri në agim në mbarë vendin pas fitores së madhe të kombëtares kuqezi ndaj Serbisë në “Gradski stadion Dubočica” të Leskovacit, në ndeshjen e vlefshme për Grupin K të kualifikueseve të Kupës së Botës.

Kthimi i kuqezinjve në atdhe është shoqëruar me entuziazëm të madh: me këngë, valle dhe brohoritje në aeroportin ndërkombëtar të Rinasit. Kombëtarja mbërriti rreth orës 03:00 të mëngjesit, ku u prit nga dhjetëra tifozë të të gjitha moshave që festuan së bashku këtë sukses historik.

Fitorja e Kombëtares 0-1 në Serbi është kthyer në një ‘festë kombëtare’. Goli i Manajt i dha tri pikë tanëve në garën për në Botërorin 2026, duke lënë pas Serbinë.

Pas ndeshjes mijëra tifozë kanë dalë në rrugë dhe kanë festuar me ngjyrat kuqezi.

E gjithë kjo atmosferë është parketuar me emocione edhe nga gazetari dhe analisti Uvil Zajmi.

Në një intervistë për “Ora Neës”, ai u shpreh se që prej vitit 1965 që ai ndjek kombëtaren shqiptare, emocionet e mbrëmshme nuk i ka përjetuar asnjëherë më parë.

“Unë u bë që në vitin 1965 që e ndjek kombëtaren dhe kurrë-kurrë nuk më kanë dhënë emocione të kësaj natyre.

Minuta dhe sekonda që nuk kalonin dhe jo vetëm unë, por i gjithë opinioni kemi parë një skuadër që shumë rrallë që gjendet në të tilla parametra.

Një skuadër që funksiononte në çdo sekondë e në çdo moment.

Një ndeshje e fituar jo vetëm në fushën e lojës, por një fitore e marrë me përgatitje dhe me mendim dhe nuk kishte aspak një fitore e rastësishme”, u shpreh ndër të tjera analisti Uvil Zajmi.

Çfarë do të thotë fitorja ndaj Serbisë?

Fitorja ne Serbi i jep mundësi Shqipërisë të jetë një hap më afër fazës “play off”.

Shqipëria renditet e dyta në grupin K të eliminatoreve të Botërorit 2026 me 11 pikë pas 6 ndeshjeve, ndërsa Serbia renditet e treta me 7 pikë pas 5 ndeshjeve.

Grupi kryesohet nga Anglia me 15 pikë pas 5 ndeshjeve. Ekipi i renditur i dyti në grup shkon në “play off”-in për Botërorin 2026.

Fitorja në këtë ndeshje shënon një hap të madh drejt kualifikimit për Kupën e Botës 2026, që do të zhvillohet në SHBA-Kanada dhe Meksikë.