Aksidentoi këmbësoren dhe u largua nga vendi i ngjarjes, arrestohet 29-vjeçari në Vlorë
Nga OraNews Përditësimi i fundit 1 Tetor 2025, 11:54
Një aksident rrugor ka ndodhur pasditen e 30 shtatorit në bulevardin “Gjergj Kastrioti” në Vlorë.
Një 55-vjeçare, e identifikuar me inicialet Z. M., u përplas nga një makinë teksa po kalonte në vendkalimin e këmbësorëve.
Drejtuesi i mjetit nuk ndaloi për t’i dhënë ndihmën e parë, por u largua nga vendi i ngjarjes. Gruaja u transportua menjëherë në spital, ku ndodhet nën kujdesin e mjekëve.
Më vonë, policia identifikoi dhe arrestoi shoferin, një 29-vjeçar me inicialet Xh. R., banues në Vlorë. Automjeti që ai drejtonte u gjet i fshehur dhe u sekuestrua.
Njoftimi:
Vlorë
Aksidentoi një shtetase në vendkalimin e këmbësorëve dhe u largua nga vendi i ngjarjes, identifikohet dhe arrestohet autori i aksidentit.
Më datë 30.09.2025, rreth orës 16:00, në segmentin rrugor “Gjergj Kastrioti”, një shtetas, gjatë drejtimit të automjetit të tij, aksidentoi këmbësoren Z. M., 55 vjeçe, e cila ishte duke kaluar në vendkalimin e këmbësorëve dhe u largua nga vendi i ngjarjes. Si pasojë 55-vjeçarja mbeti e dëmtuar dhe aktualisht ndodhet në spital nën kujdesin e mjekëve.
Falë veprimeve të shpejta hetimore, përfshirë këqyrjen e kamerave të sigurisë dhe mbledhjen e dëshmive nga shërbimet e Policisë Rrugore Vlorë, u bë e mundur identifikimi i automjetit që shkaktoi aksidentin dhe drejtuesit të tij.
Në vijim të veprimeve, u bë i mundur lokalizimi dhe arrestimi i shtetasit Xh. R, 29 vjeç, banues në Vlorë, i cili pasi kishte aksidentuar shtetasen Z. M, tentoi t’i shmangej përgjegjësisë duke fshehur edhe automjetin, i cili u gjet dhe sekuestrua në cilësinë e provës materiale.
Materialet iu referuan Prokurorisë, për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.
