Pas tensioneve në Kuvend, Berisha mbledh grupin parlamentar: Shqipëria në diktaturë
Nga OraNews Përditësimi i fundit 18 Shtator 2025, 11:12
Kryetari i Partise Demokratike, Sali Berisha ka mbledhur grupin parlamentar në selinë blu pas përfundimit të seancës së sotme në Kuvend, ku u miratua programi i qeverisë “Rama 4” me 82 vota pro, pa asnjë kundërshtim ose abstenim.
Opozita nuk mori pjesë në votim, duke protestuar kundër mënyrës se si kryeministri Edi Rama dhe shumica e tij kryen procesin e miratimit.
Berisha tha se Shqipëria gjendet zyrtarisht në diktaturë.
FJALA E BERISHËS
Sot, sipas një skenari të parapërgatitur, që e lajmëroi vetë kryehorri i kombit, se vetëm ai mund të ndërmarrë një skenar dhe akt të tillë, u asgjësua në momentin e tij më solemn, momentin më të rëndësishëm të transparencës, të përgjegjësisë, parlamenti shqiptar.
Ka ndodhur që kjo organizatë kriminale që drejtohet nga Edi Rama të kalojë ligje për 5 minuta, por nuk ka ndodhur kurrë ndonjëherë dhe në asnjë vend, që një program qeverie, një kabinet të kalojë brenda 5 minutave siç u veprua sot.
Ky është një akt brutal dhune publike ndaj qytetarëve shqiptarë të çdo spektri që ka marrë pjesë në votim.
Ky është një akt brutal dhune ndaj opozitës dhe popullit opozitar, me të cilin Edi Rama, i cili kujtonte Fahri Balliun, Klevisit, për betejat e tij kundër nenit të agjitacionit dhe propagandës, Edi Rama një bastard i xhelatit të diktaturës që ka firmosur varjen në litar dhe ekzekutimin e njerëzve të pafajshëm, sot me një skenar të parapërgatitur ekzekutoi parlamentin, parlamentarizmin, opozitën në parlament dhe vendosi kështu rekordin më kulmor të dhunës dhe poshtërimit ndaj institucionit të parlamentit, ndaj Kushtetutës në radhë të parë, ndaj institucionit kryesor të vendit, parlamentit, dhe ndaj opozitës.
Natyrisht ky zhvillim dramatik meriton dhe duhet të marrë përgjigjen më të fortë dhe më të fuqishme.
Jo në fjalë, fjalët nuk kanë aspak vlerë, por në veprime, në veprime, në veprime.
Me aktin e tij, ai faktikisht shkelmoi, shumëzoi me zero, asgjësoi vullnetin e të gjithë shqiptarëve që morën pjesë në votim. Përfaqësuesve të atyre që votuan kundër Edi Ramës. Republikës parlamentare. Kushtetutës së kësaj republike.
Shpalli luftë të hapur, me një skenar të përgatitur, bashkë me kreun e parlamentit, që është një individ skllav i krimit dhe korrupsionit të vet dhe që tregoi se është i aftë të zbatojë çdo skenar të gatshëm që vjen nga Edi Rama dhe banda e tij.
Seanca e sotme në Kuvend ishte e mbushur me tensione dhe përplasje fizike, ku deputetët e PD-së bllokuan foltoren.
Kryetari i Kuvendit dhe deputetët e shumicës votuan shpejt programin e qeverisë, ndërkohë që opozita u largua nga foltorja, duke e cilësuar procesin si të paligjshëm dhe arbitrar.
