Ish-trajneri i Belgjikës zëvendëson Jose Mourinho-n në stolin e Fenerbahçes
Nga OraNews Përditësimi i fundit 9 Shtator 2025, 20:16
Fenerbahçe ka zyrtarizuar trajnerin e ri pas shkarkimit të Jose Mourinho-s.
Klubi nga Stambolli njoftoi se Domenico Tedesco, ish-trajner i Belgjikës, ka firmosur një kontratë dyvjeçare dhe do të marrë drejtimin e skuadrës.
Italiano-gjermani 39-vjeçar do të ketë si ndihmës ish-kapitenin e klubit, Gökhan Gönül.
Tedesco u shkarkua nga posti i përzgjedhësit të Belgjikës në janar, pas një periudhe gati dyvjeçare.
Ai ka drejtuar më parë Schalke-n në Bundesliga, Spartak Moskvën në Rusi dhe RB Leipzigun, me të cilin fitoi Kupën e Gjermanisë në vitin 2022.
Mourinho, i emëruar në Stamboll në verën e vitit 2024 mes pritshmërive të mëdha, nuk arriti të realizonte objektivin kryesor: kthimin e Fenerbahçes te titulli kampion i Turqisë, i munguar që nga viti 2014.
Portugezi u shkarkua më 29 gusht, pasi klubi u eliminua nga Benfica në “play-off”-et e Champions League, duke humbur mundësinë për të hyrë në fazën e grupeve.
Megjithëse e mbylli sezonin e kaluar në vendin e dytë, pas rivalëve të Galatasarayt, “Special One” nuk e përmbushi premtimin e tij për t’i dhënë fund thatësirës së gjatë të trofeve në Superligë.
Emërimi i Tedescos shihet si një hap drejt rinovimit dhe ambicies për të ndërtuar një projekt afatgjatë.
Me eksperiencën e tij në arenën evropiane dhe energjinë e moshës, ai synon ta rikthejë Fenerbahçen në majën e futbollit turk dhe në kompeticionet madhore ndërkombëtare.
