"E rrëmbeu një burrë" - Gruaja braktis foshnjën 30-ditëshe, u gjet nga një shqiptare brenda një karroce supermarketi në park

Nga OraNews Përditësimi i fundit 4 Shtator 2025, 13:28

Një grua rome ka braktisur foshnjën e saj 30-ditëshe, e cila u gjet brenda një karroce supermarketi në një park pranë Akropolit.

Gruaja, e cila ende nuk është identifikuar si nëna e foshnjës, u arrestua mbrëmjen e së mërkurës, ndërsa kishte shkuar në Stacionin e Policisë së Kaminias për të denoncuar zhdukjen.

Ajo, sipas informacioneve, pretendon se një burrë i panjohur i rrëmbeu fëmijën ndërsa ajo po bënte pazar në supermarket dhe u zhduk.

Megjithatë, fakti që, ndonëse e kuptoi menjëherë se fëmija ishte zhdukur, nuk shkoi direkt në stacionin më të afërt të policisë për të raportuar rrëmbimin, por priti derisa të arrinte në Pire, ngre pikëpyetje.

Fëmija u vu re nga një grua 54-vjeçare shqiptare në një karrocë supermarketi pak pas orës 20:00, në një park në Bulevardin Kallirois, dhe njoftoi Policinë.

Foshnja 30-ditëshe është dërguar në Spitalin e Fëmijëve “Agia Sophia”, ndërsa Policia ka sekuestruar pamje nga kamerat e sigurisë, si nga supermarketi, ashtu edhe nga përreth parkut për të përcaktuar se kush e mori fëmijën dhe e braktisi.