Gjykata jep detyra për dosjen ndaj Rexhë Byberit! Kryebashkiaku i Tropojës shpërdoroi detyrën në hapjen e një rruge 3.2 km
Nga Edison Vatnikaj Përditësimi i fundit 24 Korrik 2025, 15:17
Gjykata e Posaçme nuk arriti në një vendim për kalimin në gjyq të dosjes penale në ngarkim të kryetarit të bashkisë Tropojë Rexhë Byberi dhe zëvendësit të tij Abedin Kërrnaja, të cilët akuzohen për shpërdorim detyre.
Gjyqtarja Irena Gjoka i la detyra prokurorit Elvin Gokaj që deri me datën 3 dhjetor të pyesë ekspertet që kanë hartuar aktin mbi vlerësimin e dëmit 2.7 mln euro.
Sipas prokurorisë rezulton se drejtuesi i Bashkisë gjatë procesit për hapjen e rrugëve me një gjatësi 3.2km, e cila në pjesën dërrmuese kalon nëpër rrugën këmbësore ekzistuese duhej të aplikonte në sistemin elektronik e-leje pranë Bashkisë Tropojë, si institucioni vendor që ka tagrin të shqyrtojë dhe miratojë lejen e ndërtimit të infrastrukturës, pasi të ketë verifikuar plotësimin e dokumentacionit të nevojshëm tekniko-ligjor nga aplikuesi, siç parashikon legjislacioni për këto lloj punimesh”.
Prokuroria thotë se: “Bashkia Tropojë duhej të bashkëvepronte me institucionet e tjera kompetente për ndërtimin e rrugës si: Agjencia Kombëtare e Mjedisit për hartimin e Raportit të Vlerësimit për ndikimin në mjedis, si edhe me Ministrinë e linjës, për impaktin e ndërtimit të rrugës së re dhe pasojat e këtyre punimeve të ndërtimit”.
Rexhë Byberi dhe Abedin Kërrnaja, të cilët janë të dy në masën e sigurisë “arrest shtëpie” akuzohen për “Shpërdorim të detyrës” dhe “Prerja e paligjshme e pyjeve”.
Rexhë Byberi dhe Abedin Kërrnaja
