EMRI+VIDEO/ Arrestohet për llogari të Italisë 50-vjeçari i rrezikshëm në Elbasan. Ja krimet e tij
Nga OraNews Përditësimi i fundit 12 Qershor 2025, 11:14
Policia e Shtetit njofton finalizimin nga Drejtoria e Forcës së Posaçme Operacionale të arrestimit për llogari të drejtësisë së Italisë të 50-vjeçarit shumë të rrezikshëm nga Elbasani.
“I dënuar në Itali, me 7 vjet burgim, për krime kundër personit dhe krime seksuale, kapet në Elbasan, 50-vjeçari.
Si rezultat i veprimeve të mirorganizuara policore dhe i shkëmbimit të shpejtë të informacioneve me partnerët italianë, nëpërmjet shërbimeve të Interpol Tiranës, shërbimet e Drejtorisë së Forcës së Posaçme Operacionale, në kuadër të operacionit “Operacionalja 47”, kapën në Elbasan, shtetasin shqiptar, të shpallur në kërkim ndërkombëtar, për llogari të Italisë, Zamir Halili, 50 vjeç.
Gjykata e Sienas, Itali, në vitin 2014, e ka dënuar me 7 vjet burgim, për plagosje, dhunë në familje dhe marrëdhënie seksuale me dhunë. Nga ky dënim atij i kanë mbetur për të vuajtur rreth 6 vjet e 9 muaj burgim.
Interpol Tirana po bashkëpunon me Interpol Romën, për të finalizuar procedurën e ekstradimit të 50-vjeçarit, në Itali”, thuhet në njoftimin e Policisë së Shteti.
