BE-ja dhe India duan të thellojnë marrëdhëniet
Nga OraNews Përditësimi i fundit 11 Qershor 2025, 19:34
“Nuk mund të kesh kurrë miq të mjaftueshëm”, tha shefja e politikës së jashtme të BE-së, Kaja Kallas, të mërkurën në një forum dialogu në Bruksel.
Me rikthimin e Donald Trump në Shtëpinë e Bardhë, Evropa tani është një partnere e parashikueshme dhe e besueshme në nivel global, deklaroi ajo.
“Kjo ofron një “dritare unike mundësie për të zgjeruar fuqinë tonë gjeopolitike”.
Një vend që luan një rol të veçantë në këtë është India.
Menjëherë pas Kallas, Ministri i Jashtëm Indian, Subrahmanyam Jaishankar, del në skenë dhe gjithashtu i përshkruan marrëdhëniet me Brukselin si një “prioritet të lartë”.
Kryediplomati indian është aktualisht në një udhëtim në Belgjikë dhe Francë. “Dialogu Strategjik” i parë midis Indisë dhe BE-së u zhvillua në Bruksel në fillim të javës, me një mori programesh mbështetëse të profilit të lartë, përfshirë forumin e lartpërmendur të mërkurën.
Në fund të javës, udhëtimi do të zhvillohet në Francë.
India është reklamuar si një alternativë aziatike ndaj Kinës për vite me radhë. Shkalla e entuziazmit për "demokracinë më të madhe në botë", varet nga situata e përgjithshme gjeopolitike.
Gjigandi aziatik nuk lodhet kurrë së reklamuari avantazhet e veta; mbi të gjitha, popullsia e tij e madhe dhe shumë e re ofron mundësi ekonomike.
Marrëdhëniet me Delhin padyshim janë thelluar vitet e fundit - por a po zhvillohen ato vërtet në mënyrën, që shpesh i përmendin Delhi dhe Brukseli?
Në një konferencë për shtyp me Kallas të martën, Jaishankar deklaroi se ishte e qartë se bota kishte hyrë në një "epokë multipolariteti dhe autonomie strategjike".
Delhi ka promovuar multipolaritetin për shumë vite. Dhe "autonomia strategjike", që do të thotë pavarësi relative nga shtetet e tjera të mëdha, rezonon me traditën e paangazhimit të nënkontinentit.
"Autonomia strategjike" nuk është më një fjalë e ndyrë
Dy vjet më parë, Presidenti francez Emmanuel Macron u përball me kritika të gjera për thirrjen e tij efektive, për më shumë "autonomi strategjike" nga Shtetet e Bashkuara.
Sot, me rikthimin e Trump në Shtëpinë e Bardhë, Evropa është përballur me një realitet politik, në të cilin kontinenti i vjetër duhet gjithnjë e më shumë të mbrohet, i vetëm kundër Rusisë dhe Kinës.
Pragmatisti dhe diplomati pro, Jaishankar, i vlerëson këto ndryshime relativisht thatë: "Ka realitete", tha ai në Bruksel. Dhe, si në një lojë shahu, duhet të jesh i kujdesshëm se si t'i përdorësh ato në avantazhin tënd.
Kjo paralajmëron një rikthim në kohë të frytshme për marrëdhëniet Indi-Evropë. Në fillim të shkurtit, Presidentja e Komisionit Ursula von der Leyen udhëhoqi Kolegjin e Komisionerëve në Delhi, për herë të parë në histori.
BE-ja dhe India po punojnë për një "Agjendë Strategjike", e cila do të paraqitet në një samit në fund të vitit.
Në zemër të kësaj agjende është rruga drejt një marrëveshjeje të mundshme të tregtisë së lirë, e cila ka qenë në proces për shumë vite.
Analistët në Indi tashmë po festojnë faktin se marrëveshja është më në fund e arritshme - në Evropë, perspektivat e saj për sukses vlerësohen me më pak entuziazëm.
Lufta për marrëveshjen është pra edhe një pasqyrim i marrëdhënies në tërësi: Ekziston optimizëm i ndërsjellë dhe një qëndrim i vullnetit të mirë - por ajo ende nuk është materializuar.
Shefi i Jaishankar, Narendra Modi, do të vizitojë gjithashtu Evropën në ditët në vijim.
Javën tjetër, ai do të kompensojë një vizitë në Kroaci, të cilën e kishte shtyrë për shkak të sulmeve terroriste islamike në Kashmir në mesin e prillit.
Përpara kësaj, ai do të udhëtojë për në takimin e G7 në Kanada.
Gjatë rrugës për atje, Modi do të ndalet në Qipro - një sulm i qartë ndaj Turqisë, e cila mbajti anën e Pakistanit në përshkallëzimin e fundit.
Në Bruksel, Jaishankar falënderoi shprehimisht von der Leyen për "dënimin e fortë të sulmit terrorist" dhe "solidaritetin e saj në luftën kundër terrorizmit".
Përshkallëzimi katër-ditor me Pakistanin mund të diskutohet edhe gjatë vizitës së tij në Francë: Avionët luftarakë francezë Rafale thuhet se u rrëzuan nga Pakistani. Kjo ende nuk është konfirmuar zyrtarisht.
