Çiklizmi në zi, ndërron jetë kampioni i pazakontë që fitoi në 'Tour'-in e Armstrong-ut
Nga OraNews Përditësimi i fundit 31 Maj 2025, 10:09
Bota e çiklizmit është tronditur sërish nga një humbje e dhimbshme: Ludo Dierckxsens, ish-çiklist belg dhe fitues etape në ‘Tour de France’, ka ndërruar jetë në moshën 60-vjeçare gjatë një gare çikloturistike me karakter bamirës.
Ngjarja tragjike ndodhi të enjten, gjatë pjesëmarrjes së tij në një iniciativë prej 1000 kilometrash të organizuar nga shoqata Kom Op Tegen Kanker (Ngrihu kundër kancerit).
Dierckxsens ndjeu papritmas një shqetësim shëndetësor gjatë rrugës dhe megjithëse ekipet mjekësore reaguan menjëherë për ta ndihmuar, nuk mundën ta shpëtonin.
"Reanimimi nisi menjëherë, por, fatkeqësisht, Ludo nuk mundi të shpëtohej", thanë organizatorët e ngjarjes.
Ludo ishte një çiklist i pazakontë: ndryshe nga shumica e profesionistëve, ai debutoi në nivelin më të lartë në moshën 29-vjeçare, pasi kishte spikatur në gara si Grand Prix de Denain.
Megjithatë, arriti të bëhej pjesë e elitës së çiklizmit ndërkombëtar në vitet ’90 dhe fillim të viteve 2000.
Momentin më të ndritur të karrierës e përjetoi në ‘Tour de France 1999’, një edicion që më vonë iu hoq Lance Armstrong-ut.
I veshur me fanellën e kampionit kombëtar belg, Dierckxsens triumfoi i vetëm në etapën e 11-të, që përfundoi në Saint-Étienne.
Aventura e tij në atë Tour, megjithatë, përfundoi para kohe.
U përjashtua pasi pranoi se kishte përdorur një medikament me kortikosteroide pa e deklaruar më parë te stafi mjekësor i ekipit.
Ai u pezullua për gjashtë muaj, por më pas u rikthye në garat profesioniste deri në tërheqjen përfundimtare në vitin 2005.
Pas përfundimit të karrierës, ai qëndroi pranë pasionit të tij duke drejtuar një dyqan biçikletash në qytetin e tij të lindjes.
Vdekja e papritur e Dierckxsens ka shkaktuar trishtim të thellë në pelotonin belg dhe në gjithë komunitetin ndërkombëtar të çiklizmit.
