Napoli nxjerr Osimhenin në shitje
Nga OraNews Përditësimi i fundit 25 Mars 2025, 18:12
Victor Osimhen është në shitje. Napoli nuk ka asnjë interes të rikthejë në Serie A sulmuesin, i cili aktualisht është i huazuar te Galatasaray.
Aurelio De Laurentiis e ka njoftuar nigerianin se është i lirë të gjejë një skuadër tjetër, por problemi është klauzola e lartë në kontratë.
Sipas “Sky Sport”, De Laurentiis nuk heq dorë nga shifra 75 milionë euro e parashikuar në kontratë.
Nëse do të ketë disa klube që janë gati ta paguajnë këtë shifër, atëherë ai do të zgjedhë klubin që ofron më shumë.
Osimhen është i zhgënjyer nga kërkesat e klubit italian, sepse deri tani asnjë klub europian nuk ka shprehur gatishmërinë për të paguar 75 milionë euro.
Shpresat janë vetëm te Manchester United, por fillimisht duhet që “Djajtë e kuq” të shesin disa yje për të fituar stabilitet financiar. Deri tani kjo nuk ka ndodhur.
