Dita Botërore e Konsumatorëve, Gjipali: Roli kyç i shoqërisë civile në konsultim dhe informim

Nga OraNews Përditësimi i fundit 14 Mars 2025, 21:42

Në emisionin Alert, moderuar nga Granit Sokolaj në Ora News, Drejtori i Lëvizjes Europiane në Shqipëri, Gledis Gjipali, theksoi rëndësinë e rolit të shoqërisë civile në proceset vendimmarrëse dhe integrimin europian. Ai u shpreh se shoqëria civile ka dy role kryesore që duhet të luajë: pjesëmarrja në konsultime me institucionet dhe informimi i qytetarëve.

Konsultimi me institucionet është një element thelbësor, pasi sjell në vëmendje problematikat reale nga terreni dhe ndihmon administratën në hartimin e politikave dhe legjislacionit më të përshtatshëm. Gjipali theksoi se administrata e një vendi nuk mund të ketë njohuri të plota mbi të gjitha çështjet që ndodhin në të gjithë territorin, ndaj përfshirja e grupeve të interesit dhe organizatave të shoqërisë civile është jetike për të sjellë eksperiencat dhe nevojat specifike të qytetarëve.

Në kontekstin e integrimit europian, Shqipëria ndodhet në një proces intensiv për përthithjen e legjislacionit të BE-së, që përfshin mbi 150 mijë faqe të cilat duhet të përshtaten me legjislacionin shqiptar. Ky është një volum i madh pune, dhe përfshirja e shoqërisë civile ndihmon si një filtër shtesë për të siguruar cilësinë e reformave dhe përshtatjen e tyre me nevojat e vendit.

Informimi i qytetarëve është po aq i rëndësishëm sa konsultimi me institucionet. Gjipali theksoi se, për shkak të shpejtësisë së këtij procesi, qytetarët dhe grupet e interesit duhet të jenë të informuar mbi ndryshimet që po ndodhin, si dhe mbi ndikimin e tyre në jetën e përditshme dhe bizneset. Kjo përfshin kostot e mundshme dhe mënyrat për t’u përshtatur me standardet e reja.

Duke dhënë një shembull konkret, Gjipali përmendi zbatimin e ligjit për sigurinë ushqimore në Shqipëri, ku një nga sfidat kryesore ishte rregullimi i thertoreve artizanale. Më parë, therja dhe tregtimi i kafshëve ndodhte në kushte të pakontrolluara higjieno-sanitare, shpesh edhe në rrugë. Sot, kjo situatë është përmirësuar ndjeshëm, megjithëse rritja e standardeve ka sjellë edhe kosto shtesë për bizneset.

Në përfundim, Gjipali theksoi se roli i shoqërisë civile në këtë proces është kyç për të siguruar që reformat të jenë jo vetëm të shpejta, por edhe cilësore, me një ndikim sa më pozitiv për qytetarët dhe bizneset shqiptare.

NDIQNI EMISIONIN E PLOTË “ALERT” NË “ORA NEWS”