S'ka vend për Eriksen te Manchester United, në verë pritet të largohet falas nga "Old Trafford"
Nga OraNews Përditësimi i fundit 7 Dhjetor 2024, 15:04
Christian Eriksen (32 vjeç) ka qenë titullar në njërën prej dy ndeshjeve të para të trajnerit të ri Amorim te Manchester United, duke qëndruar në stol në tjetrën (ndeshjen e ‘Europa League’ kundër Bodo Glimt).
Megjithatë, atmosfera që e rrethon atë tregon se për ish-lojtarin e Interit nuk ka vend në planet e ardhshme të drejtimit të ri teknik te "Djajtë e Kuq".
Kontrata e mesfushorit danez me Manchester United skadon më 30 qershor dhe, sipas “Sky Sports Deutschland”, nuk pritet të ketë një propozim rinovimi nga klubi i Premier League.
Për këtë arsye, nëse nuk shitet në janar, do të largohet falas në verën e ardhshme. Ndërkohë, Manchester United po punon për të përforcuar mesfushën e Amorim, duke kërkuar lojtarë klasikë, edhe krijues. Për Eriksen, duket se nuk ka më vend.
