Kearns: Britania duhet të qëndrojë me vendosmëri me Kosovën kundër terrorizmit
Nga OraNews Përditësimi i fundit 3 Dhjetor 2024, 20:24
Deputetja britanike Alicia Kearns i ka bërë thirrje Londrës zyrtare që të mbështesë Kosovën në luftën kundër terrorizmit, sidomos pas sulmit të fundit ndaj infrastrukturës kritike, më e madhja kjo pas përfundimit të luftës dhe sulmi më i rrezikshëm pas Banjskës më 23 shtator të vitit të kaluar.
Kearns ka thënë në X, se sulmi terrorist në kanalin e ujit Ibër-Lepenci ishte një përpjekje e qartë për t’i shkaktuar dëm civilëve përmes shkatërrimit të infrastrukturës kritike.
Ajo ka ngritur shqetësimin se dështimi i Serbisë për të arrestuar dhe deportuar Milan Radoiçiç dhe përgjegjësit e tjerë për sulmin në Banjska, inkurajon të tjerët të ndjekin shembullin e tyre, duke besuar se do të gjejnë strehë të sigurt pas akteve të tilla.
“Britania e Madhe duhet të qëndrojë me vendosmëri me Kosovën kundër terrorizmit”, ka porositur Kearns.
Serbia nuk ka arrestuar Milan Radoiçiç, i cili ka marrë përgjegjësinë për sulmin në Banjska dhe vazhdon ende të qëndrojë i lirë.
