Rama: Nis ndërtimi i Parkut Urban në Spitallë, hapësira rekreative në shërbim të qytetarëve
Nga OraNews Përditësimi i fundit 25 Nëntor 2024, 16:14
Në Spitallë të Durrësit ka nisur puna për ndërtimin e Parkut Urban, që do ta kthejë këtë zonë të harruar në një hapësirë rekreative në shërbim të qytetarëve.
Kryeministri Edi Rama ndau sot në rrjetet sociale pamje nga kantieri i punimeve për ndërtimin e këtij parku, i cili do të ofrojë gjelbërim të shtuar, zonë për këmbësorët, pistë biçikletash, terrene sportive dhe zonë të dedikuar për fëmijë.
Konkretisht në një sipërfaqe prej 12 000 metra katror në zonën e Spitallës do të ngrihet një park me hapësira rekreative në shërbim të qytetarëve.
Projekti rehabiliton të gjithë zonën dhe i jep asaj një zhvillim të mëtejshëm duke rritur cilësinë e jetesës së banorëve.
Një tjetër element i rëndësishëm i projektit është shtimi i biomasës së gjelbër përgjatë gjurmës së ndërhyrjes dhe krijimi i xhepave të gjelbër që do të mundësojnë hapësira publike të përshtatshme për zhvillimin e aktiviteteve në komunitet.
