EMRI/ Benz-i përplas një mjet dhe një këmbësor, vdes 72-vjeçari, ngordhin edhe dy kafshët e tij në Sarandë
Nga OraNews Përditësimi i fundit 27 Tetor 2024, 08:05
Një aksident tragjik ka ndodhur në orët e para të së dielës në rrugën Delvinë-Kardhiq, pranë fshatit Fushë Vërri, bashkia Delvinë.
Një automjet ka përplasur një banor, i cili po ecte në rrugë së bashku me një lopë dhe një gomar. Viktima është identifikuar si Luan Xhuvani rreth 72 vjeç. Aksidenti ka ndodhur tek rruga në fshatin Bajkaj.
Si pasojë e goditjes, banori ka humbur jetën në vend, ndërkohë edhe të dy kafshët kanë ngordhur nga përplasja.
Policia ndodhet në vendngjarje dhe po kryen hetimet për të zbardhur shkaqet e aksidentit dhe rrethanat që çuan në këtë tragjedi.
Njoftimi i policisë:
Sot, rreth orës 03:45, në aksin rrugor Sarandë-Tuneli i Skërfices, në afërsi të rrethrrotullimit të fshatit Bajkaj, shtetasi E. O., 63 vjeç, dyshohet se ka humbur kontrollin mbi drejtimin e automjetit tip “Benz” dhe ka aksidentuar këmbësorin, shtetasin L. Xh., 72 vjeç, e më pas, është përplasur me një tjetër automjet tip “Benz”, me drejtues shtetasin V. G.
Si pasojë e aksidentit, shtetasi L. Xh. ka ndërruar jetë gjatë transportit për në spitalin e Sarandës.
Drejtuesi i automjetit, shtetasi E. O., u shoqërua në komisariat për veprime të mëtejshme.
Grupi hetimor vijon veprimet për zbardhjen e plotë të rrethanave të aksidentit.
