VIDEO-LAJMI/ I qeshur dhe me syze, një ditë pas dënimit Salianji shkon në selinë e PD-së, takon Bardhin
Nga Mola Luku Përditësimi i fundit 27 Shtator 2024, 09:53
Një ditë pasi Gjykata e Apelit konfirmoi dënimin me 1 vit burg të Ervin Salianjit, deputeti i PD ka mbërritur herët sot në selinë blu, ku është takuar me kreun e grupit parlamentar të PD, Gazment Bardhi.
Në seli ndodhet edhe nënkryetari i PD, Agron Gjekmarkaj, ndërsa sot është njoftuar se do të mbahet edhe një mbledhje e grupit parlamentar.
Salianji u shfaq i qeshur teksa hynte në seli.
Gjykata e Apelit la dje (26 shtator) në fuqi dënimin me 1 vit burgim për deputetin demokrat Ervin Salianji, për akuzën e “Kallëzimit të rremë” për rastin e audio-përgjimit ku pretendohej se vëllai i ish ministrit të Brendshëm Fatmir Xhafaj, ishte përfshirë në një episod trafiku droge.
Pas vendimit, Salianji foli për mediat për një vendim politik, ndërsa u shprehe se do të bëjë fushatë edhe nga burgu.
“Dosje e kopsitur nga fillimi në fund. Vendimmarrje politike. Do ta shohin si do të shkojë historia. Jam i nderuar dhe kam medalje që shndrit në karrierën politike. Do e ankimoj vendimin dhe do ndjekim procedurat e tjera gjyqësore”, tha ai.
