Nga shteti ligjor e Reforma në Drejtësi, te zgjedhjet dhe demokracia/ Shqipëria përballë BE-së në 15 tetor
Nga OraNews Përditësimi i fundit 25 Shtator 2024, 20:48
Në 15 tetor Shqipëria do të hapë negociatat me BE për kapitujt themelorë.
Mësohet se të gjitha vendet anëtare të Bashkimit Evropian, përfshirë Greqinë kanë dhënë dakordesinë që në mesin e muajit tetor të zhvillohet konferenca e dytë ndërqeveritare.
Burime pranë parlamentit bëjnë me dije se në datën 2 tetor qeveria shqiptare dorëzon ne Bruksel pozicionin negociues dhe në datën 15 tetor do të organizohet konferenca e dytë ndërqeveritare.
Në procesin e negociatave për herë të parë është përfshirë edhe parlamenti, dhe kryetarja e komisionit të integrimit Jorida Tabaku ka njoftuar anëtarët e këtij komisioni që negociatat për kapituj themelorë do të zhvillohen në mesin e muajit tetor.
Ndërkaq Tabaku u ka kujtuar të gjithë anëtarëve te komisionit se dokumenti i pozicionit negociues të qeverisë shqiptare është konfidencial dhe secili prej tyre ka firmosur deklaratën ku angazhohet të mos e publikojë.
Shqipëria hapi zyrtarisht negociatat për anëtarësim në BE në korrikun e vitit 2022.
Prej atij momenti, i gjithë shteti shqiptar u përfshi në procesin e shqyrtimit analitik të legjislacionit të njohur ndryshe si Screening.
Pas kësaj vendi ynë ishte gati për të nisur bisedimet për clusterin e parë ose ndryshe për kapitujt themelorë, të cilët quhen kështu pasi përfshijnë çështjet më të rëndësishme nga shteti ligjor e Reforma në Drejtësi, te zgjedhjet, demokracia por edhe ekonomia.
Dhe pse Shqipëria ishte gati për të hyrë në këtë fazë të re negociatash, rruga u vështirësua për shkak te vetos së Greqisë dhe ngërçit te krijuar për shkak te arrestimit të Alfred Belerit, minoritarit që fitoi bashkinë e Himarës por që u dënua për korrupsion zgjedhor.
Mesa duket ky ngërç është kapërcyer dhe në mesin e muajit tetor Shqipëria do të ulet në tryezën e bisedimeve me Bashkimin Evropian.
