“BOOM” KËRKESASH PËR KREDI/ Rritje e lartë nga individët, më pak refuzime nga bankat
Nga OraNews Përditësimi i fundit 20 Shtator 2024, 11:01
Bankat kanë njohur një rritje të dosjeve me kërkesa për kredi, kryesisht nga individë dhe për blerje të pasurive të paluajtshme. Sipas të dhënave niveli i refuzimeve arriti në rreth 6 për qind. Edhe në rastet e bizneseve u shënua zgjerim i portofolit të huadhënieve
Kërkesa për kredi u rrit gjatë 6 mujorit te parë të 2024. Sipas Bankës së Shqipërisë institucionet financiare morën në shqyrtim 72,418 aplikime për hua, shifër kjo ne rritje me 11.4% me shumë se e njëjta periudhë e një viti më parë.
Nga këto 72 mijë aplikime, ose përkatësisht 91% e kërkesave ishin nga individë dhe të tjerat bizneseve.
Niveli i refuzimit shfaqet i ulët, por në këtë rast kryesojnë individët duke pasur më shumë preference për zgjerimin e bizneset.
Referuar të dhënave, dy grupet bankare me kapital te huaj dhe atyre vendas, kanë shfaqur qëndrime të ndryshme sa i përket refuzimeve.
Bankat shqiptare kanë shfaqur prirje lehtësuese, duke refuzuar vetëm 4% të kërkesave për huamarrje nga individët, ndërsa bankat e huaja kanë refuzuar 7% të aplikimeve.
Sipas Bankës së Shqipërisë, sektori i pasurive të paluajtshme kryeson financimin më te madh të marrë nga bankat.
Vetëm në muajt e parë të këtij viti është marrë gati 4.5 miliardë lekë kredi për blerje te pasurive te patundshme nga 3.1 miliardë që u mor vitin e kaluar.
