Analiza me dyer të mbyllura e Qeverisë me kryebashkiakët në Shkodër: Borxhet kanë rënë, janë rritur të ardhurat e shpenzimet
Nga OraNews Përditësimi i fundit 9 Mars 2024, 13:05
Kryeministri Edi Rama ka mbledhur sot në Shkodër kabinetin qeveritar dhe kryetarët e Bashkive.
Në fokus të diskutimeve do të jenë shëndetësia, arsimi, bujqësia, siguria, financat e deri tek infrastruktura, pronat dhe burimet njerëzore.
Më herët, ministri i Pushtetit Vendor, Arbjan Mazniku ka publikuar në rrjetet sociale foto para takimit të sotëm.
“Nisim takimin sot me anëtarët e qeverisë dhe 61 kryetarët e bashkive për sfidat dhe angazhimet e pushtetit vendor për Shqipërinë 2030”, shprehet Mazniku.
MBLEDHJA ME DYER TË MBYLLURA
Gjatë këtij takimi pune me dyer të mbyllura, po diskutohet për pritshmëritë, objektivat dhe angazhimet e përbashkëta në shërbim të qytetarëve.
Dhe në fokus të kësaj analize janë referuar në mbledhje shifrat e vitit 2015 me ato të një viti më parë.
Konkretisht, burime nga takimi bëjnë me dije për “Ora News” se sa i përket Burimeve njerëzore, është analizuar numri i punonjësve për 1000 banorë për të gjitha bashkitë, në aparatet e tyre dhe shërbimet që ofrojnë.
Lidhur me financat, mësohet se është theksuar në analizë se bashkitë janë futur në sitë kapacitetet e bashkive për të mbledhur të ardhurat e tyre, si dhe cilat janë bashkitë që performojnë më mirë.
Po ashtu, bashkitë janë analizuar edhe sa i përket aftësisë për të shkruar projekte dhe për të thithur fonde nga Bashkimi Europian.
Te ardhurat vendore në 2023-in u rritën me 271% krahasuar me 2015-ën. E thënë në gjuhën e shifrave, nga 13 miliardë në 31 miliardë.
Nga ana tjetër, shpenzimet vendore janë 102 % më të larta se në 2015-ën.
Borxhet e bashkive të vogla, janë të varura në masën 85 % nga grantet dhe transfertat e qeverisë.
Bashkitë më të mëdha e kanë të balancuar këtë raport në 55%.
Detyrimet e njësive vendore janë ulur me 60% nga 12 miliard në 4.8 miliard lekë.
Borxhet e bashkive janë 4.8 mld lekë, 60% më pak se në 2015, ndërsa ajo e Kavajës dhe e Vorës janë dy bashkitë me më shumë borxhe.
14 bashki janë të varura 85% nga grantet dhe transfertat e qeverisë, ndërsa 10 bashki (me mbi 100 mijë banorë janë të varura në masën 55%.
