Të jetosh nën frikë, 7 anëtarët e familjes në një ambient me djalin e sëmurë e të dhunshëm
Nga Sonila Musai Përditësimi i fundit 27 Nëntor 2023, 16:33
Familja Gjata prej vitesh jeton nën frikën se djali i tyre i sëmurë mund të godasë ndonjë prej të vegjëlve të shtëpisë. Fati e ka sjellë që ai të dëmtohet pas një temperature të lartë, por në mundimet që i sjell varfëria shprehen se nuk mund t’i plotësojnë dot të gjitha kushtet. Ndaj apeli i tyre shkon te ndihma e shqiptarëve.
Ky është Florenc Gjata 32 vjeç.
Lindi fëmijë i shëndetshëm por në muajin e tretë të jetës së tij kaloi një temperaturë duke e lënë atë me pasojë.
Vuan nga epilepsia dhe prapambetje mendore.
Nëna e tij e sëmurë dhe me problemet e moshës tregon se ndër vite gjendja e tij është përkeqësuar.
Në shtëpi jetojnë 7 persona mes të cilëve dhe dy fëmijë të vegjël të cilët ndihen të rrezikuar nga qëndrimi në një dhomë më Florencin që shpesh është agresiv.
Për 32-vjeçarin kanë krijuar një ambient të ndarë, por është e pa rregulluar ndaj zonja e shtëpisë kërkon ndihmë.
Përshtatja e dhomës për Florencin do të krijonte më shumë siguri për të vegjëlit, e po ashtu do ti krijonte sado pak kushte 32-vjeçarit.
