Basha i "pret" kokën Bardhit, përjashtohet nga partia, Kryesia e PD: Agjendë personale në bashkëpunim me non grata
Nga OraNews Përditësimi i fundit 9 Tetor 2023, 20:10
Kryesia e Partisë Demokratike ka përjashtuar nga partia deputetin Gazment Bardhin.
Mësohet se Kryesia e PD-së ka vendosur ditën e sotme përfundimin e anëtarësisë së Bardhit në këtë forcë politike.
“Vendimi i Kryesisë së PD erdhi pas shkeljeve të njëpasnjëshme të kryera nga ish-sekretari i Përgjithshëm ndaj vendimeve të organeve kolegjale të PD, shumë prej të cilave janë votuar dhe janë nënshkruar prej tij si dhe për veprime në kundërshtim me interesat politike dhe elektorale të PD, për mosnjohjen e institucioneve të dala nga vota e demokratëve. Po ashtu dhe për ndjekjen e një agjende personale, përmes të cilës kërkon të zhvendosë PD nga orientimi i përcaktuar nga Kuvendi dhe Këshilli Kombëtar, në raport me aleatët strategjikë dhe bashkëpunimin me individët e sanksionuar si non grata, që kanë ndërmarrë një aksion dy vjeçar kundër Partisë Demokratike.” thotë Kryesia e PD-së.
Kujtojme se Gazment Bardhi nuk njeh kryesinë e re që e ka perjashtuar, pasi sipas tij kryesia nuk ekziston.
