VIDEO/ Juventusi tepër i fortë për Lazion, bardhezinjtë marrin përkohësisht kryesimin e Serie A

Nga OraNews Përditësimi i fundit 16 Shtator 2023, 17:02

Juventusi ka fituar 3-1 ndaj Lazios, duke marrë përkohësisht kryesimin e kampionatit italian. Bardhezinjtë ishin tepër të fortë për Lazion, duke shënuar 2 herë që në pjesën e parë.

Në minutën e 10-të sulmuesi serb, Dusan Vlahovic tundi rrjetën, ndërsa në minutën e 26-të Chiesa dyfishoi pas një asistimi të Rabiot. Me avantazhin 2-0 të Juventusit, ekipet shkuan në dhomat e zhveshjeve.

Në fraksionin e dytë të lojës, Luis Alberto shënoi në të 64-ën duke provuar që të hapë llogaritë e ndeshjes. Por tre minuta më pas, Vlahovic shuajti ato pak shpresa të Lazios për të dalë me një rezultat pozitiv pasi shënoi golin e tij të dytë personal në këtë ndeshje dhe të tretin për Juventusin.

Me këtë fitore "Zonja e Vjetër" ngjitet përkohësisht në vendin e parë, në pritje të derbit Inter-Milan që luhet në orën 18:00.