Porto Palermoja në flakë/ 40 efektivë dhe një helikopter, por shuarja e flakëve ende e largët
Nga Brahim Shima Përditësimi i fundit 19 Gusht 2023, 11:23
Prej ditës së djeshme zjarri në zonën e Porto Palermos vijon të djegë sipërfaqe të madhe pyjore.
Zjarri ka rënë në një mal të pyllëzuar dhe për të bërë të mundur shuarjen e këtyre flakëve është ndërhyrë me helikopter nga ajri, ndërsa situata duket të jetë ende kritike.
Era e fortë e vështirëson punën e helikopterit, i cili ka hasur pengesë në mbushjen e ujit dhe transportin e tij drejt vatrave aktive të zjarrit.
Aktualisht, referuar deklaratave të policisë, raportohet se nuk ka rrezik për banesat.
Ndërsa Ministria e Mbrojtjes thotë se 40 efektivë të Batalionit të tretë të Këmbësorisë nga Forca Tokësore janë angazhuar sot për shuarjen e zjarrit masiv në Porto Palermo.
"Mbrëmjen e djeshme u ndërhy edhe me helikopterin Cougar, i cili është rikthyer edhe sot në mëngjes në zonë.
Puna është e vështirë për shkak të terrenit, ku është përhapur zjarri. Përpara ligjit çdokush që ndez zjarre, çdokush që nuk njofton dhe padashje apo me dashje bëhet bashkëpunëtor.
Do bëjmë të pamundurën për të ruajtur pasurinë tonë kombëtare!", thekson Ministria e Mbrojtjes
