Zjarrvënie, Policia: Pranga 59 vjeçarit në Arrapaj, dogji 1 dynim tokë
Nga OraNews Përditësimi i fundit 4 Gusht 2023, 11:39
Policia e Durrësit ka arrestuar një 59-vjeçar. Ai akuzohet për zjarrëvënie të qëllimshme në zonën e Arapajt.
Përmes një njoftimi për media, Policia e Durrësit bënë të ditur se 59-vjeçari, ndezi zjarr për të djegur kabllo dhe për pasojë, dogji 1 dynym tokë në pronësi të një shtetasi tjetër, çka rrezikoi dëmtimin e banesave përreth dhe shkaktoi ndotje të lartë të ajrit.
“Menjëherë pas marrjes së njoftimit se në fshatin Arapaj, një shtetas kishte ndezur një zjarr që po dëmtonte pronat përreth, shërbimet e Komisariatit të Policisë Durrës, si rezultat i ndërhyrjes së menjëhershme dhe profesionale, kanë bërë të mundur neutralizimin e flakëve, si dhe arrestimi në flagrancë të autorit të dyshuar të këtij rasti, shtetasit R. K., 59 vjeç, banues në fshatin Rrashbull, Durrës.”, njofton Policia.
“Për shkak se 59-vjeçari kishte ndezur zjarr për djegien e disa kabllove (me qëllim përfitimin e bakrit), u dogj 1 dynym tokë në pronësi të një shtetasi tjetër, u rrezikua dëmtimi i banesave dhe pronave të tjera përreth, si dhe u shkaktua ndotje e lartë e ajrit në zonë.”, bënë të ditur Policia e Shtetit.
“Drejtoria Vendore e Policisë Durrës apelon për qytetarët që në asnjë rast të mos ndezin zjarre, pasi ky veprim përbën krim dhe ndëshkohet penalisht, si dhe i fton ata që të denoncojnë në numrin 112, çdo rast të tillë, me qëllim ndërhyrjen e menjëhershme për shuarjen e flakëve dhe për procedimin penal të shtetasve përgjegjës.”, përfundon njoftimi i Policisë së Shtetit.
