SEANCA E FUNDIT/ Nga Ahmetaj, Gjinushi, kanabisi, diplomat e Mjekësisë, fondet e BE-së, Opozita “ndez” Kuvendin

Nga OraNews Përditësimi i fundit 20 Korrik 2023, 10:09

Në seancën e sotme, që është e fundit për këtë sesion parlamentar, kryeministri Edi Rama ka zgjedhur që të mos jetë i pranishëm, në një kohë që socialistët kanë marrë udhëzime të qarta për të votuar draftin e legalizimit të kanabisit, si dhe punës së detyruar për 5 vite pas studimeve të mjekëve të rinj.

Dhe në një kohë kur studentët Mjekësisë u mblodhën para selisë parlamentare në protestë kundër projektligjit që parashikon ngrirjen e diplomave të tyre për një periudhë 5-vjeçare pas përfundimit të studimit, në Kuvend pati debate të forta mes mazhorancës dhe opozitës për këtë çështje.

Shkak është bërë projektligji për kanabisin mjekësor, ku opozita kundërshton ndryshimin e rendit të ditës duke i rënë tavolinave. Refuzimi i kryetares se Kuvendit Lindita Nikolla solli dhe pushtimin e foltores nga opozita.

Gjithashtu një tjetër draft që pritet të shkaktojë debate të forta do të jetë dhe projektligji i miratuar në fshehtësi të plotë nga socialistët dhe në mungesën e opoziytës në komision, ai për legalizimin e kultivimit të kanabisit në Shqipëri për qëllime mjekësore.

ZHVILLIMET NË KUVEND MINUTË PAS MINUTE

Ora 09:50 Studentët e Mjekësisë protestë para Parlamentit: Duam zgjidhje, nuk pranojmë në internim!

Ashtu siç paralajmëruan, studentët e mjekësisë kanë nisur protestën e tyre para Parlamentit, ndërsa kundërshtojnë nismën e qeverisë për ligjin që i detyron ata që të punojnë deri në 5 vite në vend dhe më pas do të diplomohen.

Ora 10:20 Tabaku: Korrupsioni është kthyer në gangrenë në Shqipëri. Parlamenti po mbyllet me një njollë turpi

Deputetja e PD-së Jorida Tabaku ka folur para nisjes së seancës plenare, e fundit për këtë sesion duke deklaruar se parlamenti po mbyllet me një njollë turpi.

Ora 10:30 Korrupsioni me fondet e BE-së, deputeti i PD-së me shalqi në parlament: Kjo ka ngelur për të gjithë fermerët

Deputeti i PD-së Saimir Korreshi ka zgjedhur që këtë herë të shkojë me shalqi në seancën e sotme plenare, ne shenje proteste kunder korrupsionit qeveritar qe coi ne bllokimin e fondeve te BE-se per bujqesine. 

Ora 10: 35 Bardhi thirrje Nikollës: Ndërprit seancën dhe sill këtu Edi Ramën, vjedhja e shekullit nuk mund të kalojë në heshtje

Kreu i grupit parlamentar të PD-së Gazment Bardhi i ka kërkuar kryetares së Kuvendit Lindita Nikolla që të ndëpresë seancën e sotme, dhe ajo të rifillojë vetëm kur Edi Rama të pranojë të japë llogari për aferën e inceneratorëve.

Ora 10:40 Arratisja e Ahmetajt, Berisha kërkon dorëheqjen e Ramës, debat me Nikollën: Po shkelmoni ligjet për interes të Doshit, Gjinushit dhe… 

Ish-kryeministri Sali Berisha reagoi ashpër sot në Kuvend lidhur me zhvillimet e fundit në vend.

Ora 10:50 Zhupa: Turp! Dje mbledhje e paligjshme, sot doni t’i jepni një mandat të dytë Gjinushit

Deputetja e PD-së Ina Zhupa e cilësoi të paligjshëm mbledhjen e djeshme të komisionit vetëm nga deputetët e maxhorancës që kaluan projektligjin për Akademinë e Shkencave.

Ora 11:00 Vasili thirrje Kuvendit: Lejoni studentët e mjekësisë që të flasin këtu, jeni faqja e zezë! 

Nënkryetari i Partisë së Lirisë, Petrit Vasili i bëri thirrje Kuvendit që të lejojë studentët e mjekësisë që protestojnë jashtë këtij institucioni, që t’u jepet mundësia që të flasin në foltore.

Ora 11:15 "Të dashur anëtarë të organizatës kriminale, të dashur kanabistë..."/ Noka "shpërthen" në Kuvend, i ndërpritet fjala

Deputeti i Partisë Demokratike, Flamur Noka nga foltorja e Kuvendit sulmoi ashpër maxhorancën, ndërsa theksoi se hallet e kësaj qeverie janë bashkëpunimi me krimin.

Ora 11:30 Sula: Ahmetaj u tregua burrë i zgjuar që iku! Është tmerri juaj se i di të gjitha gjërat. Jap dorëheqjen nëse… 

Deputeti i PD-së Dashnor Sula akuzoi sot maxhorancën se përdor forcën e kartonit për të plotësuar gjithçka që ka në mendje.

Ora 11:40 “Gjinushi, produkt i një marrëveshje kriminale”, Berisha: Ligji i ASH, historia më e turpshme në 30 vite 

Ish kryeministri Sali Berisha nga foltorja e Kuvendit, e konsideroi një turp vendimin e qeverisë për të detyruar studentët e mjekësisë që të punojnë 5 vite ne vend.

Sakaq duke u ndaluar te vendimi për ti zgjatur mandatin Skënder Gjinushit në krye të Akademisë së Shkencave, Berisha tha se kjo është një marrëveshje mes Ramës dhe Tom Doshit dhe historia me e turpshme ne 30 vjet.

Ora 11:55 Deputetët e PD takojnë studentët dhe kërkojnë t’u jepet fjala në seancë. Opozita rrethon foltoren, Felaj: Kujdes! Garda ka ligjin 

Deputetët e opozitës, pasi zhvilluan një takim me disa studentë të mjekësisë, që po protestojnë jashtë Kuvendit, kërkuan që këta të fundit të futen në sallë.

12:10 FOTO-LAJMI/ 1 ditë pas ndërprerjes së fondeve të BE-së, ambasadorja Hohmann ndjek debatin në Kuvend 

Një ditë pas publikimit të lajmit se KE ka pezulluar fondet për bujqësinë në Shqipëri, ambasadorja e Delegacionit të Bashkimit Evropian në Shqipëri, Christiane Hohmann ka shkuar në Kuvend.

12:30 Bardhi: Hajdutët fshihen nga frika, Rama të vijë të japë llogari, Ahmetaj sot merr rrogën në arrati

Kreu i Grupit Parlamentar të PD-së, Gazment Bardhi është shprehur se 3 njerëz në arrati marrin para nga buxheti i shtetit.

Bardhi e etiketoi ish-ministrin Arben Ahmetaj dhe biznesmenët e inceneratorëve, Klodian Zoto e Mirel Mërtiri.

12:40 Debatet mes mazhorancës dhe opozitës, ndërpritet për 30 minuta seanca plenare

Është ndërprerë për rreth 30 minuta seanca e sotme në Kuvend pas debatet e forta mes opozitës e mazhorancës.

RENDI I DITES

Në seancën e sotme do të diskutohen raportet vjetore të disa institucioneve shtetërore, si dhe do të shqyrtohen aktet normative dhe projektligje të rëndësishme:

Raport i veprimtarisë vjetore të Kontrollit të Lartë të Shtetit për vitin 2022.

Raport i veprimtarisë vjetore të Autoritetit të Komunikimeve Elektronike dhe Postare për vitin 2022

Raport i veprimtarisë vjetore të Autoritetit të Mbikëqyrjes Financiare vitin 2022.

Akt normativ nr. 2, datë 7.6.2023 “Për disa shtesa në ligjin nr.29/2023, “Për tatimin mbi të ardhurat””.

Akt normativ nr. 3, datë 21.6.2023 “Për disa ndryshime në aktin normativ nr.1, datë 20.3.2019, të Këshillit të Ministrave, “Për pjesëmarrjen e personelit të Forcave të Armatosura të Republikës së Shqipërisë në misionin e Kombeve të Bashkuara në Sudanin e Jugut (UNMISS)”, miratuar me ligjin nr.23/2019”

Akt normativ nr. 4, datë 21.6.2023 “Për pjesëmarrjen e personelit të Forcave të Armatosura të Republikës së Shqipërisë në misionin e Kombeve të Bashkuara në Abyei (UNISFA)”.

Projektligj “Për trajtimin e veçantë të studenteve që ndjekin programin e integruar të studimit të ciklit të dytë “Mjekësi e përgjithshme” në institucionet publike të arsimit të lartë”

Projektligj “Për kontrollin e kultivimit dhe përpunimit të bimës së cannabis-it dhe prodhimit të nënprodukteve të saj për qëllime mjekësore dhe industriale.

Projektligj “Për disa shtesa dhe ndryshime në ligjin nr.113/2020, “Për shtetësinë””

Projektligj “Për disa ndryshime në ligjin nr.9917, datë 19.5.2008, “Për parandalimin e pastrimit të parave dhe financimit të terrorizimit”, të ndryshuar”

Për disa shtesa dhe ndryshime në ligjin nr.157/2013,”Për masat kundër financimit të terrorizimit”, të ndryshuar”

Projektligj “Për disa shtesa dhe ndryshime në ligjin nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar.

Projektligj “Për administrimin e objekteve të konfiskuara si ndërtime pa leje, me qëllim përdorimin e tyre për interes publik apo strehim social, si dhe zbutjen e pasojave sociale të shkaktuara”

Projektligj “Për një ndryshim dhe disa shtesa në ligjin nr. 9632, datë 30.10.2006, “Për sistemin e taksave vendore”, i ndryshuar.