Çfarë po ndodh me orkat, instikti i çuditshëm për të sulmuar varkat shqetëson ekspertët
Nga OraNews Përditësimi i fundit 24 Qershor 2023, 18:05
Ekspertët kanë regjistruar disa raste të sjelljeve të çuditshme të orkave të cilat sulmojnë varkat me udhëtarë.
Rasti i fundit është ai i ekipit të Ocean Race's i cili shijoi momente emocionuese por po ashtu edhe të frikshme.
Pamjet tregojnë orkat, të njohura gjithashtu si balenat vrasëse, duke i ardhur përreth jahtit holandez, përpara se të niseshin me shpejtësi drejt tij, duke u përlasur dhe kafshuar timonin.
"Ky ishte një moment i frikshëm," tha kapiteni i ekipit. “Tre orka erdhën drejt nesh dhe filluan të godasin timonët. Impresionuese ti shohësh, por edhe një moment i rrezikshëm për ne si ekip. Ne zbritëm velat dhe ngadalësuam varkën sa më shpejt që të ishte e mundur dhe për fat pas disa sulmeve ata u larguan", tha ai.
Edhe në Portugali u raportuan një ngjarje e ngjashme. Madje në ngushticën e Gjibraltarit janë regjistruar më shumë se 20 incidente vetëm në maj.
Në disa raste, varkat janë dëmtuar ndjeshëm. Po ashtu në fillim të kësaj jave, një orka u përplas në mënyrë të përsëritur në një jaht në Detin e Veriut jashtë Shetland, në incidentin e parë të tillë në ujërat veriore.
