Në kërkim të kryetarit, përplasje në radhët e PD-së zyrtare, çfarë pritet që të ndodhë sot
Nga OraNews Përditësimi i fundit 6 Qershor 2023, 10:12
Në Partinë Demokratike që për momentin po drejtohet nga Gazmend Bardhi nuk bien dakord për mënyrën se si kjo forcë duhet të ristrukturohet pas dorëheqjeve të Lulzim Bashës dhe më pas edhe të Enkelejd Alibeajt.
Pas një takimi të zhvilluar paraditen e së hënës me grupin parlamentar, u ra dakord që procesi i zgjedhjes së strukturave të reja të mos jetë i nxituar, i njëanshëm dhe që nxit përçarjen duke thelluar ndasitë brenda Partisë Demokratike.
Madje vetë Bardhi tha se ishte i gatshëm të ulej me këdo brenda demokrateve, përfshirë edhe Sali Berishën.
“Unë nuk kam asnjë kompleks të ulem me cilindo. Kur kam pranuar të ulem në një tryezë për interesin e shqiptarëve me Edi Ramën, nuk kam kompleks tjetër. Selia nuk është një ambient që detyron që duhet të bëhen patjetër mbledhjet aty.
Duhet të na jepni më shumë kohë për të normalizuar marrëdhëniet me njëri-tjetrin”, është shprehur Bardhi. Ndërkohë ai është treguar edhe i matur në përgjigje kur është pyetur nëse Berisha është trembur pas rikthimit të Bashës, ndërkohë që ky i fundit dorëzoi PD sepse nuk po e përballoi dot sulmin e Berishës.
“Unë nuk jam analist, duhet të pyesni aktorët që ju përmendët”, tha ai.
Por ndryshe ka ndodhur gjatë pasdites pas një takimi që bardhi ka pasur me Kolegjin e Kryetarëve të degëve në rrethe të kësaj partie.
Në një deklaratë për mediat thuhet se Partia duhet pa asnjë vonesë të zgjedhë kryetarin e saj dhe të nisë organizimin dhe përzgjedhjen, të ekipeve që do ta drejtojnë këtë parti drejt zgjedhjeve të ardhshme.
Ndryshe nga deputetët që kërkuan kohë, krerët e degëve thonë se partia nuk mund të vazhdojë të qëndrojë më gjatë pa kryetar madje ai duhet të zgjidhet brenda 15 korrikut.
Një vendim përfundimtar pritet ta marrë kryesia e partisë që mblidhet pasditen e sotme.
