Skena kaotike në Holandë, tifozët sulmojnë familjarët e anglezëve, lojtarët përplasen me ultrasit (FOTO+VIDEO)
Nga OraNews Përditësimi i fundit 19 Maj 2023, 08:49
Ndeshja AZ Alkmaar-West Ham përfundoi me kaosin që përfshiu lojtarët miq dhe tifozët në shkallët e stadiumit holandez. Mbështetësit e skuadrës vendase reaguan ashpër ndaj miqve që triumfuan 1-0 dhe prenë biletën e finales.
Teksa familjet e lojtarëve anglezë ndodheshin në tribunë, ata u sulmuan nga një grup i vogël huliganësh të AZ Alkmaar, ndërsa lojtarët miq dhe drejtori sportiv Mark Noble kaluan rrethimin për t’i mbrojtur nga sulmi.
Lucas Paqueta, Aaron Cresswell dhe Flynn Downes tentuan të kundërpërgjigjeshin por u kufizuan nga forcat e sigurisë në stadium.
Ndërkohë, Michail Antonio kaloi mbi reklamat elektronike duke hyrë në shkallë ndërsa forcat e sigurisë u kritikuan ashpër për mungesën e reagimit.
Edhe kapiteni Declan Rice bashkë me Jarrod Bowen u përplasën me turmën e ultrasve të veshur me të zeza dhe të paidentifikueshëm për shkak të kapuçëve që mbanin në kokë.
